Aprezenta Relatoriu Alto Nivel Ba PR Taur, Horta Husu Mauk Moruk Hapara Asaun

Laureadu Nobel da Paz no eis Prezidenti Republika (PR), José Ramos Horta, husu ba lider Konsellu Revolusaun Maubere (KRM), Paulino Gama “Mauk Moruk” (MM), atu hapara ona sira nia assaun.

Prezidenti Painel Independenti Alto Nivel ONU ba Operasoens Paz nian, Ramos Horta, mensiona katak, Mauk Moruk ho nia grupu tenki hapara ona sira nia aktu para bele halo dialogu.

“Hau rasik apelu ba Mauk Moruk diak liu simu Presidente Republika nia liafuan para asaun sira hot-hotu ne’ebe nia elementu halo tun mai iha Dili ho garantiha para halo dialogu, tanba Estadu labele interfere Tribunal, ita hot-hotu sujetu defende ba Tribunal,” hateten Jose Ramos Hosta ba jornalista hafoin aprezenta relatoriu alto nivel ba PR Taur Matan Ruak iha Palacio Presidenti, Segunda (29/6/2015).

Horta mesniona katak, prosesu hotu ne’ebe maka la’o iha Tribunal, Estadu la iha kbi’it atu book no hatun. Maibe, bele liu husi dialogu atu hetan nia solusaun.

“Iha Timor ne’e la iha veteranus ne’ebe maka importante liu veteranus rua; PR Taur Matan Ruak ho Maijor Jeneral Lere Anan Timur. Sira maka bele haree oinsa rezolve problema ida ne’e no PR Taur rasik iha vontade boot atu resolve situasaun Mauk Moruk ho L-7 nian,” hateten Ramos Horta.

Kona-ba relatoriu alto nivel ne’ebe Ramos Horta aprezenta ba PR Taur iha relasaun ho servisu no susesu boot ne’ebe maka Horta halo durante mandatu nudar Prezidenti Painel Independente Alto Nivel ONU nian ba Operasoens Paz.

Horta esklarese katak, relatoriu ne’ebe nia entrega ne’e, atu reforma Peace Keeping nia mandatu ba mundu no oinsa maka haree Peace Keeping la’o diak liu no ONU bele hala’o servisu diak liu tan.

“Ita buka ajuda kedas para konflitu tensaun ne’e la monu ba funu, hanesan Syria nian,” esplika Jose Ramos Horta.

José Ramos Horta dehan, Presidente Republika kontente ho rezultadu ida ne’e tanba foti tan Timor nia kontrbuisaun nia naran.

“Ami koalia mos kona-ba situasaun interna iha Timor Leste. Aproveita, hau fo parabens ba PR Taur, tanba to’o agora nia vizita ona sukus 300-resin. Atu dehan deit katak, iha mundu ne’e la iha Xefi Estadu ida   la iha Xefi do Governu ida ne’ebe halo viazen ba Timor tomak,” hateten Ramos Horta.

PR Taur dehan, Presidente mos kontente, tanba nia hare mudansa iha foho, povu nia vida mos muda dadauk, buat balun ne’ebe mak nia hirus tristi nafatin mak marenda eskolar, ne’e kontinua a’at los. avi

Jornal Nacional