TROKA LA SAMA, PD APREZENTA KANDIDATU 9

Partido Democratico (PD), aprezenta ona kandidatu nain 9 ba Primeiru Ministru, Rui Maria de Araújo atu troka saudozu Fernando La Sama de Araújo hanesan Ministru Kordenador Asuntu Sosial no Ministru Edukasaun.

Sekertariu Jeral Partidu Demokratiku (PD), Mariano Asanami Sabino informa katak, PD aprezenta ona kader ka kandidatu terbaik PD nian lubuk ida atu bele substitui saudozu La Sama. Nia haktuir, PD sempre preparadu atu halo saida deit ba Estadu ida ne’e, maibé Primeiru Ministru mak sei hare no tetu, ida ne’ebé mak diak liu hodi hatutan servisu La Sama nian.

“Ami hare husi intelektual, hare husi kapasidade no pezu politiku, ami hare katak, Vice Prezidente Parlamentu Nasional, Adriano do Nacimento hanesan kandidatu ida, Antonio da Conceção, Arkanjo Leite, Alex ne’ebé mak durante ne’e akompaña La Sama nia servisu, Rui Hanjam, Marselino Magno, João Rui Amaral ne’ebé mak uluk hanesan mós La Sama nia Xefe gabinete no João Boavida i Eis Deputada Getrudes Moniz,”informa Asanami Sabino ba jornalista sira iha Sede Sentru Formasaun PD Comoro Dili, Segunda (29/6).

Nia dehan, kandidatu nain 9 ne’ebé PD aprezenta ba Governo ne’e, atu Primeiru Ministru hili ema ida hodi troka saudozu La Sama hanesan Ministru Kordenador Asuntu Sosial i Ministru Edukasaun.

“Ami hasoru malu formalmente ho Primeiru Ministru Rui Maria de Araújo, tanba besik ona loron 40, tanba uluk ami hanoin katak, depois loron 40 mak koalia kona-ba pozisaun La Sama nian, ba Ministru Estadu Kordenador Asuntu Sosial no Ministru Edukasaun,”relata Asanami Sabino.

Maibé Asanami dehan, PD hanoin ba La Sama nia mensajen ne’e katak, Estadu nia dignidade bo’ot liu duke dignidade pesoal ninian, no La Sama mós dehan katak, hare malu ba, tanba Estadu persija ema hotu.

Asanami dehan, iha La Sama nia moris tomak, nia sempre koalia kona-ba Estadu importante liu buat hotu.

Asanami esklarese, bainhira La Sama assume pasta Prezidente Interino, La Sama konsege hakotu krize 2006 no lidera ho susesu operasaun ba Petisionário iha Ermera no fatin seluk tan.

Entaun Asanami dehan, hanoin kona-ba La Sama nia mensajen kona-ba Estadu importante ne’e, PD hanoin katak, maske seidauk to’o loron 40, maibé PD hanoin ona atu tau ema troka La Sama, tanba nia (La Sama) husik hela obra, ideas no programa prioridade lubuk ida iha Ministeriu Edukasaun.

“Ita hanoin katak, tenke iha kontinuasaun ba hanoin no idea ne’ebé mak La Sama husik hela. Entaun ho ida ne’e mak motiva enkontu ida ho Primeiru Ministru, ami aprezenta kader lubuk ida iha partidu lubuk ida iha Partidu PD nia laran, para depois Primeiru Ministru bele tetu se deit mak Primeiru Ministru bele hiliatu ba hamutuk ho Primeitu Ministru,”tenik Asanami.

Asanami dehan, karik mak Primeiru Ministru hili Ministru Antonio da Conceiçõ ka Primeiru Vice Prezidente Parlamentu Nasional, Adriano do Nacimento, PD sei nomeia fali ema hodi substitui sira nia fatin, hanesan Ministru MCIA no Vice PN.

Asanami esklarese, PD mós sei konsulta ho Prezidente Partidu CNRT, Kay Rala Xanana Gusmão ho Prezidente Partidu Frenti Mudança, José Luis Guterres, tanba Governo ida ne’e, sei Governo Bloku.

“Ami mós nakloke ba Prezidente Repúblika, para kandidatu ne’ebé mak ami aprezenta ba Governo no Governo atu nomeia ba ne’e, hot-hotu hakarak,”katak nia.

Nia esklarese, antes PD atu aprezenta kandidatu hirak ne’e ba Primeiru Ministru Rui Araújo, estrutrua partidu PD tomak halo uluk enkontru ida hodi halo reflesaun ba mensajen saudozu La Sama nian kona-ba ‘imi haree malu ba, tanba Estadu presiza ita’.

Asanami dehan, mensajen La Sama nian ne’e atu fó hanoin ba PD kona-ba servisu saida deit mak PD tenke halo ba Estadu ida ne’e, i PD tenke kontinua asegura servisu La Sama nian, ne’ebé durante ne’e hahu husi Prezidente Parlamentu Nasional, Vise Primeiru Ministru to’o Ministru Kordenador Asuntu Sosial no Ministru Edukasaun.

“Se deit mak tama iha Ministru Edukasaun hodi troka La Sama, Partidu PD sei kontrola, para ninia lalaok ne’e hanesan La Sama, hakuak ema hotu, fó dalan ba ema hotu, laiha partidarija iha ne’eba,”afirma Asanami.

Nia dehan, durante La Sama assume Ministru Edukasaun, nia hakuak Professor hotu, rona sira nia halerik, no rona i hadomi alunus sira hotu.

Asanami dehan, ekipa ne’ebé mak durante ne’e reforsa La Sama nia servisu, sei kontinua servisu nafatin ho Ministru foun ne’ebé Governo nomea ba.

Tanba Asanami dehan, PD nia prinsipiu ne’e, se deit mak tama iha Governo, nia ne’e servidor, la’os ba atu hetan buat ruma ka sai ema bo’ot.

Alende ne’e, Primeiru Ministru Rui Araújo dehan, nia simu no disponivel para, ema se deit mak atu ba troka La Sama ne’e, tenke tau intrese Estadu nian iha oin.

Rui Araújo dehan, se deit mak atu ba assume fali Ministru Kordenador Asuntu Sosial no Ministru Edukasaun ne’e, tenke asegura programa prioridade ne’ebé mak La Sama husik hela.cos

Jornal Nacional