TL Hetan Reseitas Husi Mina no Gas 46,3%

DILI - Reseitas neebe Timor Leste (TL) hetan husi reseitas domestika mina no gas hamutuk 46,3%, laos ho ida nee deit, maibee ba oin sei aumenta iha resitas estadu hodi kontinua dudu dezenvolvementu ba oin.

Lia hirak nee hatoo husi Ministra Finansas Santina Cardoso, ba Jornalista sira hafoin remata Konsellu Ministru (KM), iha Palasiu Governu, Tersa (14/07/2015).

Ita hotu hatene katak husi fulan Janeiru 2015 too agora resitas neebe tama mai iha kofer estadu, liu husi reseitas domestika ho Mina no gas nia hamutuk 46,3%, maibee laos ida nee deit ba oin ami kontinua tau atensaun para reseitas nee kontinua tama, atu nune ita uza hodi hadia ita nia dezenvolvementu iha pais ida nee,” hateten Santina.

Ministra Finansas nee hatutan Orsamentu Jeral Estadu (OJE) tinan 2015, neebe Governu aloka ho montante billaun 1.5, agora VI Governu Konstitusional ezekuta ona 44,7%, maibee sira espera katak too tinan 2015 remata sira sei ezekuta too 100%.

Konaba preparasaun orsamentu estadu ba tinan 2016-2017, Ministeru Finansas reliza enkontru Jornada Orsamental, deside ona ba tina rua nee governu sei aloka Orsamentu Estadu nia hamutuk billaun 2.5, husi tinan 2016 nia sira sei aloka billaun 1.3, depois ba 2017 nia governu alokoa tan billaun 1.2, hodi halao dezenvolvementu ba nasaun nee. Informasaun kompletu iha STL jornal no STL Web, edisaun Kuarta (15/7/2015). Joao Anibal

Suara Timor Lorosae