JOVEN TENKI KUIDADU AN

Vice Prezidente Comisaun Nacioinal Combate HIV/SIDA, Dionisio Soares Babo apela ba joventude atu kuidadu an hodi lao tuir dalan ne’ebe los, hodi hadok husi moras HIV/SIDA, tanba to’o agora laiha aimoruk atu bele kura moras refere.

“Moras HIV/SIDA uluk nia numeru sei ki’ik, maibe agora aumenta, ida ne’e hafanu ita liu-liu joven atu kuidadu an hodi lao tuir inan aman nia liafuan katak, ba eskola ba los eskola ka ba servisu ba los servisu, nune’e ita bele prevene moras ne’e,”apela Dionisio Babo ba joven sira liu husi nia intervensaun iha konsertu muzika kampaña HIV/SIDA iha jardin Bebora, Sabado (1/8).

To’o oras ne’e iha mundu tomak seidauk iha aimoruk ne’ebe atu kura tanba ne’e diak liu prevene duke kura tanba moras ne’e laos estraga deit ema ida, maibe sei estraga ema hotu liu-liu familia .

Joven sira bele lao ba fatin hotu maibe ba ho objetivu ida ne’ebe positivu no bele fo vantajen diak iha futuru laos ba ida ne’ebe estraga futuru.

Iha parte seluk, Deputada Josefa Pereira sekunda moras ne’e estraga ema nia futuru tanba ne’e laos deit ba joven maibe entidades hotu, tenki lao tuir dalan ne’ebe los.

Tuir Eis Prezidente Grupu Moilher Parlamentar Timor Leste (GMPTL) ne’e hatete katak, joven mak futuru nasaun, tenki kuidadu an no repeita an bainhira sidauk tempu atu halo buat ne’ebe morese para halo.

Denio Morais nudar joven ne’ebe mos asiste iha konsertu ne’e sente kontenti rona esplikasaun ba moras HIV/SIDA.

“Programa sosializasaun ne’e labele para deit iha ne’e, maibe tenki kontinua hodi fo hanoin ba joven sira. Basa ho kondisaun Timor nia agora ne’e bele hamate joven sira nia futuru atu bele hetan moris diak no saudavel,”tenik nia.

Banda muzika ne’ebe harame konsertu muzika iha jardim Bebora mak banda mujika Dili All Star,Vertical Horizontal D’Kacken no Kantores Ego Lemos no konsertu ne’e asisti husi vice prezidente CNC-HIV/SIDA, Dionisio Babo, Sekertariu Ezekutivu CNC-HIV/SIDA, Rev. Daniel Marsal inklui membru Governu balun.

Programa realiza ho diak no susesu tanba servisu hamutuk ho RTT, MCIA, Organizasaun Berliku Fanun Rai no CNSTL.

Konsertu muzika ne’e anima tebes komunidade sira iha area Bebora inklui area sira seluk.ola

Jornal Nacional