ADERITO SOARES LIDERA PARTIDU LIBERTASAUN POPULAR

DILI - Partidu Libertasaun Popular (PLP), Kinta (10/12), ofisialmente lori ona sira nia dokumentus ho total apoiantes rihun tolunulu resin lima (35.000) ba rejistu ona iha Tribunál Rekursu (TR) hodi hetan legalidade nu’udar organizasaun polítika iha nasaun RDTL.

Komitiva Partidu PLP ne’ebé xefia hosi portavóz Andre da Costa “L4” to’o iha Tribunál Rekursu iha tuku 10:30 akompaña hosi estrutura sira hodi kontinua ba andar leten hasoru malu ho Prezidente Tribunál Rekursu hodi rejistu partidu PLP. Sede partidu PLP lokaliza iha Matadouro, edifísiu Prokuradór Distritál Dili nia oin.

Partidu PLP seidauk iha estrutura difinitivu, maibé oras ne’e partidu PLP sei ho prezidente interinu, Adérito  Soares (Eis Komisáriu Komisaun Antí Korupsaun). Tuir Portavóz L4, bainhira partidu PLP hetan ona legalidade hosi Tribunál Rekursu foin sira halo kongresu hodi hili sira nia estrutura formál.

“Horsehik, PLP rejistadu ona iha TR ho apoiantes 35,000 hodi hetan legalidade sai organizasaun polítika iha nasaun demokrásia ne’e.

Iha prosesu rejistu ne’e, dokumentus apoiantes ekipa refere lori ba intrega direta iha Prezidente Tribunál Rekursu, Guilhermino da Silva no sira hein de’it nia rezultadu.

Durante tinan barak, L4 haktuir, veteranus, simpatezantes, militante, juventude, estudantes, ativistas, dirijentes PLP, halo esforsu no serbisu boot hodi halibur asinatura apoiantes hosi munisípiu 13, hanesan rekerimentu ida ba prosesu rejistrasaun tuir ne’ebé ezisti.

“To’o ohin loron, PLP halibur ona total asinante hamutuk 35,000. Maibé, Ministériu Justisa hato’o mai ami katak atu rejistu agora sei bazeia de’it ba lei antigu (asinantes 1,500). PLP mós hato’o ona dokumentus seluk tuir lei haruka ba TR. PLP fiar prezidenti TR sei foti desizaun tuir lei ba ezisténsia legál PLP nian iha tempu badak,” nia informa.

 Liu-hosi oportunidade ne’e, nia afirma tan, sira la haluha fó agradesimentu ba apoiantes no saudasoens ba povu Timor-Leste laran tomak nia kontribuisaun, kooperasaun, solidaredade no maturidade iha ámbitu demokrásia ne’e hatudu ona iha funu naruk. No hato’o mós respeita ba ezisténsia partidu sira ne’ebé oras ne’e daudaun iha asentu Parlamentu Nasionál inklui partidu polítiku seluk ne’ebé namkari iha rai doben Timor-Leste.

L4 hatutan , PLP konsiente katak, oras ne’e, la’os tempu kampaña maibé  PLP hakarak afirma katak PLP mosu atu loke espasu luan liu-tan ba partisipasaun ativu povu nian iha prosesu rekonstrusaun nasionál iha rai doben Timor-Leste. Buat balun la’o daudaun ona, maibé PLP fiar katak iha aspeitu barak hosi presesu rekonstrusaun nasionál inklui presesu dezenvolvimentu presiza kurizi no hadi’a.

“PLP nia ekipa intelektuál sira oras ne’e halo hela serbisu hodi dezenvolve planu estratéjia ne’ebé maka sei hato’o ba povu tomak bainhira tama ona iha tempu kampaña eleitorál 2017. PLP sei halo deklarasaun formál ba públiku kona-ba ezisténsia PLP bainhira hetan ona desizaun hosi TR,” L4 tenik.

Tuir observasaun diáriu ne’e iha TR, maoria pesoál sira asumi funsaun iha Partidu CNRT, Fretilin, PD, Frente Mundansa, PSD, KHUNTO, akompaña lori dokumentus partidu PLP ba rejistu iha Tirbunál Rekursu.

Hafoin ekipa partidu PLP intrega tiha dokumentus, Prezidente Tribunál Rekursu (TR), Guilhermino da Silva subliña katak dokumentus partidu PLP, TR simu ona no sei haree estuda didi’ak dokumentu sira ne’e.

“Agora ami sei estuda didi’ak dokumentus ne’ebé partidu PLP hatama ona, depois haree no estadu foin Tribunál Rekursu fó rezultadu,” dehan Guilhermino da Silva.

Antes ne’e, tuir Diretór Nasionál Rejistu Notariadu, Maria Fátima informa, tama ona fulan Dezembru tinan ikus hosi 2015, maibé foin partidu foun rua maka mai rejistu iha Diresaun Nasionál Rejistu Notariadu hodi hetan legalidade.

“Partidu foun rua ne’e, ida lidera hosi eis Ministru Saúde Nélson Martins no ida Partidu Libertasaun Populara PLP lidera hosi Adérito  Soares hodi hetan legalidade iha DNRN,” Diretora DNRN esplika.

Tuir informasaun katak atuál Prezidenti Repúblika, Taur Matan Ruak mós inklui funda PLP no nia (Taur) sei lidera partidu refere hafoin ninia mandatu hanesan prezidenti repúblika ramata iha tinan 2017.(Max)

Timor Post