VI GOVERNU SEIDAUK HALO MUDANSA SIGNIFIKATIVU

Diretor Ezekutivu, Judicial System Monitoring Program (JSMP), Luis Sampaio haree katak, VI Governu konstitusional ne’ebe lidera husi Primeiru Ministru Rui Maria de Araújo, tersa (16/2/16) halo ona tinan ida maibe la iha mudansa signifikativu ba dezenvolvimentu rai laran liu-liu iha infrastrutura nian.

“Tuir matan ami nian, VI Governu ne’e halo duni, mas tanba prezu ka beban problema ne’ebe maka Governu sira antes husik hela, entaun to’o agora ita seidauk haree mudansa signifikativu barak iha aspeitu dezenvolvimentu ninian, hanesan parte estrada sei at nafatin, be’e mos sei menus no seluk tan maibe ida ne’e laos kulpa Governu ida ne’e nian tanba problema sira ne’e mai kedas husi Governu antes ne’e,” hatete Direktor ezekutivu JSMP ne’e ba JN-Diário, Tersa (16/02), iha nia servisu fatin Colmera, Dili.

Diretor Ezekutivu JSMP ne’e hatutan tan, problema ne’e los, dala ruma fallansu ne’ebe iha maka Governu la identifika prioridade entre preoridade hotu-hotu tanba Governu ne’e mai ho durasaun tempu ne’ebe badak ka limitadu ho ne’e nia nia labele rezolve problema hotu ne’ebe Governu sira antes husik hela, ho ne’e tenki identifika preoridade sira fundamental liu iha VI Governu atu ne’e bele tau rekursu, tau osamentu hodi rezolve lalais problema urgente ninian hanesan be’e mos ne’ebe mak sei menus halo udan mai ona maibe halo ema sei ba buka bee mos ba kuru nafatin, estrada at hodi halo dezastre barak barak. Luis hatete.

Luis hatutan tan, ba area justisa nian, sira haree esforsu Ministeriu Justisa ninian halo kordenasaun servisu no mos kontinua tau esforsu atu bele hadia seitor justisa.

“Maibe ida ne’e mos ita haree la iha mudansa bo’ot maibe komitmentu planu ne’ebe sira halo, oinsa nomeasaun papel foun ba direktores no xefi departamentu sira hodi hadia jestaun administrasaun iha Ministeriu justiça,” hatete Luis.

Kona ba deklarasaun husi PM Rui rasik katak atu halo reforma ba administrativu nian, poupansa, bandu ema labele fuma iha publiku halo kontrolu operasaun ba transporte Estadu iha loron ferias sira, ida ne’e tuir JSMP nia haree katak, Primeiru Ministru rasik iha inisiativa diak no vontade maka’as maibe la hetan apoiu husi entidade sira seluk tanba forsa politika ne’e la iha.

Ba iha tinan 2016 ne’e, nia dehan, Governu ezekuta hotu deit osamentu ne’ebe maka planea ona ne’e, maibe atu halo politika real la iha.

Iha parte, Diretor Organização Não Governamental, Asia Justtice And Rights (AJAR). José Luis de Olveira, hatete, nia parte fo parabens ba VI Governu ne’ebe lidera husi Primeiru Ministru Rui Maria de Araújo tanba buat balun nia bele halo diak iha nia Governansaun maibe iha buat barak haree seidauk iha mudansa signifikante.

“Ita komprende katak buat ne’e akontese tanba, mai ha’u pesoalmente PM iha ema ne’ebe hanoin diak, iha dedikasaun no motivasaun diak, problema maka PM hanesan kondutor maibe kareta nain ne’e ema seluk, ho ne’e kondutor labele halo sasan diak ruma tuir nia hakarak maibe tenki tuir patraun,”Diretor AJAR ne’e hatete.

José Luis de Olveira mos dehan, se hanesan ne’e satan 2016 agora ne’e tinan politiku, tinan ikus atu ba eleisaun jeral, entaun interese partidu politiku ne’e mak domina iha ne’eba.Des

Jornal Nacional