PD DIAK LIU SAI HO DIGNIDADE…!!!

Jornal Nacional, editorial

Partido CNRT kontinua mantein  posizaun divorsiu ho Partido Demokratiku (PD) iha Bloku Koligasaun maske PD rasik tenta Presidente Partido CNRT, Kayrala Xanana Gusmao atu halo dialogu.

Maske senti todan simu realidade nee maibe PD nudar partido politiku ida labele minimiza an, haraik an ba kargu ka posizaun iha governu hodi halai tu’tuir partido seluk husu kargu no servisu.

Deklarasaun CNRT nian nee halo PD fuan  moras, maibe nee mak realidade politika, hamutuk iha bloku la harmonia ona diak liu fahe malu. Duke hamutuk iha uma kain ida maibe la rona malu, ida idak lao tuir ida ida ninia hakarak.

Agora dilema mos ba PD, sekarik sai duni husi governu, prontu sai opozisaun ka kontinua apoia governu maske sai ona husi Bloku Koligasaun. PD karik senti, sai husi governu no halo opozisaun iha parlamentu nee dik, maibe opozisaun nee kontra governu Xanana, CNRT mesmo Rui Araujo husi Fretilin.

“Hanesan membru hau rezeita dialogu ho PD, hau halo dialogu ho PD atu koalia saida, pesoalmente sira nia preokupasaun hakarak ba koalia ho Presidente laos ho ami,” Cesar Valente.

Pozisaun sira hanesa nee hatudu katak CNRT lakohi duni ona lao hamutuk ho PD iha governu, nebe membru governu PD nian tenki hatudu berani hodi deside entrega kargu sira nee ba CNRT.

Membru PD nebe asumi kargu politiku nudar Ministru, Vice Ministru no Sekretario Estadu tenki berani entrega kargu ministru, vice minsitru no sekretario estadu nee ba CNRT atu labe iha presedente ida katak PD ambisaun ba ukun.

PD partyido mais joven, PD partido jerasaun foun labele hanesan fali eis Presidente Republika Indonesia, Gusdur nebe lakohi husik kargu hodi nunee kous sai husi palacio Presdente laran.

Nudar partido politiku ida tenki toma pozisaun nebe forte, labele mamar, CNRT lakohi ona atu lao hamutuk entrega kargu sira nee ba fali CNRT hodi nomeia ba fali membru governu foun.

Problema nee klaru hamosu pro no kontra iha PD laran, li’liu sira nebe iha ezekutivu tamba hakarak ka lakohi divorsiu nee impaktu ba sira tenki husik kargu hodi entrega ba CNRT.

Agora membru governu husi PD nian mos dilema atu deside se fo atu hili, hakarak kontinua sai ministru diak liu sai independente nebe too mandatu hotu afilia kedas ba CNRT, se hakarak metin nafatin ho PD diak liu sai, kargu fo fali ba CNRT atu deside.

Konaba preokupasaun publiku nian katak bloku koligasaun nakfera governu monu, lae, dadaun bloku koligasaun nee laos ona PD maibe politikamente CNRT ho FRETILIN iha koligasaun ida tamba Primeiru Ministru husi Fretilin, membru governu nee barak mai husi Fretilin, sa tan governu aloka osan ba ZEESM nebe Sekejen Fretilin, Mari Alkatiri mak lidera.

Neebe FRETILIN mos garante ona katak bloku koligasaun nakfera, Fretilin fo apoiu ba governu, li’liu Orsamentu Jeral Estadu aprova atu nunee governu labele monu no lebele iha eleisaun antisipada.*