SIMU DESIZAUN CNRT, PD HUSU DIALOGU HO XANANA

Partidu Demokratiku (PD) iha resposta karta partidu CNRT hateten katak sira simu desizaun CNRT nian maibe husu atu halo dialogu ho  Prezidente Partidu Congresu Nasional Rekonstrusaun Timor-Leste (CNRT), Kay Rala Xanana Gusmão.

Iha Segunda (21/3/2016), PD responde ona karta ne’ebe mak CNRT haruka hodi hasai PD husi Bloku Koligasaun (BK).

Prezidente PD, Adriano do Nascimento, dehan, los duni nia simu karta husi CNRT, nune’e mos nia responde ona karta ‘’divorsiu’’ ne’e.

“Ami responde tiha ona karta husi CNRT nian, karta entrega iha CNRT nia kantor, maibe ninia kontiudu depois mak fo sai, sante-sante deit sa, lalika ansi,” dehan Adriano ba Jornalista sira iha uma fukun Parlamentu Nasional (PN), Tersa (22/03/2016).

 “Depois mak imi (red-Jornalista) rona ba, tanba buat ida politik ukun ne’e buat hot-hotu lori ba media, media ne’e la’os fatin, kuandu buat hotu lori ba media ne’e ita la buka dalan diak ida ba nasaun. PD nia prinsipiu mak atu laiha koligasaun ka iha koligasaun inportante nasaun ida ne’e hakmatek iha estabilidade, dezenvolvimentu la’o nafatin,” dehan Adriano.

Maske nune’e PD husu ba Prezidente CNRT Kay Rala Xanana Gusmão atu halo dialogu ho konselhu lideransa sentral PD nian hodi koalia ba malu kona ba asuntu koligasaun em relasaun ho estabilidade Governativa.

Nia dehan, PD hanesan partidu Joven nian ne’ebe sira hanoin ba dok, la’os hanoin ba aban ka bainrua nian, tanba ne’e maka nia husu atu kalma loron ida sei hetan resposta kompletu ho rajaun fundamental ba karta ne’e.

“Ami nia prinsipiu maka diak liu tur hamutuk hodi rezolve, labele lori malu ba iha media no estrada. Ami seidauk hasoru maun Xanana, maibe la’os hasoru atu koalia deit ba karta ne’ebe sira haruka mai ami, mais ami koalia mos konaba asuntu ezonerasaun ba xefi Estado Maior das F-FDTL nian, antes ne’e ami hasoru tiha ona ita nia bispu nain rua, Primeiru Ministru, Rui Maria de Araujo, no Prezidente Republika, momentu ne’eba ami mos atu hasoru malu ho maun Lu Olo no Mari, mais primeiru ministru dehan mai ami katak sira nain rua ba tiha ona singapura, no maun Xanana mak seidauk hasoru to’o agora, mais ami iha planu ona,” dehan Prezidente PD ne’e ho oin hamnasa.

Maske Adriano do Nascimento rejeita hodi lakohi fo sai karta nia konteudu ne’e, maibe tuir fonte balun fo sai katak konteudu karta resposta ba CNRT ne’e hateten katak, PD simu desizaun partidu CNRT nian.

Iha fatin hanesan, Deputado bankada CNRT, Arão Noe, katak, nia rasik mos seidauk hatene karta resposta husi Partidu Demokratiku nian.

“Ami rona informasaun katak karta tama ona, mais kona ba nia kontiudu ami seidauk hatene, tanba iha nivel CPN partidu nian, depois mak sira fo hatene mai ami. Mais tuir informasaun ne’ebe mak iha katak PD hakarak halo Dialogu, mais ne’e responsabilidade partidu nian,” dehan Arão.

Atu deside dialogu desizaun mai husi nivel altu partidu nian, tan ne’e maka  kuandu dialogu maka sei fo opsaun rua katak mantein ka sai.

“Kuandu dialogu bele iha dalan rua, se ita konsensus ida ho objetivo defende programa Governu nian no fo  apoiu total ba Governu , ida labele sai fali opozisaun ba programa Governu nian ne’ebe ita hot-hotu iha laran se ita ho objetivo ida ne’e hau hanoin partidu sei deside, mais iha oin mak halo tuir iha kotuk komentario soke ba soke mai entaun iha la loyal, ne’ebe PD tenke hakru’uk total ba programa Governu nian no tau interese nasional iha leten, labele hatama interese partidu nian,” dehan nia. mia

Jornal Nacional