Fransés mate iha Bali hafoin rezisti ho violénsia ba detensaun

Forsa polísia sira oho ona fransés ida ne'ebé iha situasaun iregular hafoin rezisti ho violénsia ba nia detensaun no sona polísia ida, hatete hosi responsável lokal ida iha loron-segunda ne'e.

Amokrane Sabet hetan konvokasaun dalabarak hosi polísia iha furak hirak ikus ne'e hafoin kesar barak ne'ebé hato'o beibeik hosi habitante sira hosi aldeia ne'ebé nia hela ba no kesar hahalok ne'ebé perturbadór.

"Iha kesar barak hasoru mane ne'ebé ba restaurante sira no la selu, la'o ho tudik ida no ameasa ema sira no nunka aprezenta nia aan iha konvokatóriu sira hodi hetan interogasaun", hatete hosi porta-vós ida hosi polísia Bali nian, Hery Wiyanto, ba ajénsia France-Presse (AFP).

Fonte hanesan fó sai mós katak mobiliza tiha ona ajente polísia na'in 40 resin no hosi serbisu sira imigrasaun nian hodi kaer mane ne'e no hasai hosi nasaun tanba nia vistu liutiha ona prazu iha fulan-Setembru 2015.

Bainhira forsa polísia sira to'o iha Canggu, aldeia ne'ebé Amokrane Sabet hela no hanesan fatin ne'ebé turista estranjeiru sira frekuenta maka'as, fransés ne'e mosu hodi hatudu tudik ida.

"Ami nia ofisiál ida tenta hakbesik nia no halo kalma nia maibé Sabet sona nia ho tudik", hatutan hosi Wiyanto no subliña katak ajente ne'e la konsege aguenta tanba kanek sira.

Porta-vós hatete katak ajente sira hahú tiru bainhira fransés ne'e la rona avizu dala tolu.

Situasaun violénsia sira hanesan ne'e ladún akontese iha Bali, illa ida ne'ebé nia populasaun barak liu iha relijiaun hindu iha nasaun ne'ebé iha populasa barak musulmanu iha mundu ne'ebé tinan-tinan hetan vizita hosi turista estranjeiru millaun resin.

SAPO TL ho Lusa