PN LAMENTA HO SAUDOZU LITER NIA MATE – LA IHA AMBULANSIA ATU TULA

Parlamentu Nasional (PN) husu ba Governu labele halo diskriminasaun ba veteranus sira, li-liu ba Saudozu Cesario Ximenes alias Liter ne’ebe mak hakotu is iha Domingo (12/06/2016), maibe nein membru Governu ida mak marka prejensa, pior liu tan maka ambulansia atu tula mate isin husi Hospiotal Nasional Guido Valadares (HNGV) atu ba Baucau mos la iha hotu.

Membru bankada CNRT, Domingas da Silva “Bilou-mali” ne’ebe hanesan mos veterana preokupa tebes ho situasaun ne’e, tanba bainhira rona Sauzodu Liter is kotu iha HNGV nia ho nia maluk veteranu balu ba kedas hodi hare no iha ne’eba sira kontaktu ba membru Governu, maibe laiha ema ida mak marka prejensa.

“Hau triste tebes, tanba Governu halo diskriminasaun maka’as ba veteranus sira, ba saudozu Liter ambulancia atu tula deit mos dehan laiha, no aimoruk sona mate isin mos laiha ne’ebe ami tau hamutuk fali osan hodi sosa aimoruk ba sona saudozu hafoin hodi ba nia rain, situasaun ida ne’e labele akontese tan,” afirma deputada Bilou mali ba Jornalista sira iha uma fukun PN, Tersa (14/06/2016).

Deputada Bilou haktuir tan, Saudozu Liter antes mate nia ba halo tratamentu iha Surabaya, segundu ba iha Singapura ikus liu nia mate tan deit ninia atestadu mediku ne’e ba trata tun, trata sa’e lakonsege hetan rezultadu ida diak ikus mai nia hakotu is, nia moras komplikadu, tanba ita hatene katak kuandu veteranus ona ne’e, tanba durante sofre ba luta nian.

Veterana ne’e dehan tan, ema sira ne’ebe hetan tiha ona kondekorasaun no desmobilizasaun ne’e responsabilidade Estadu nian, la’os Governu nian, familia fo apiu deit ba Governu no Estado, tanba ema sira ne’e Estado ninia ema, hanesan sira mate ne’e atu hako’i ka lae ne’e responsabilidade Estado li-liu Governu.

Iha fatin hanesan, deputado bankada FRETILIN, Manuel Castro hateten katak, kuandu veteranu Cesario Ximenes “Liter” sira hotu halai to’o ba hospital, telefone ba membru Governu ida deit mos la fo atensaun, kareta ambulancia atu tula mate isin mos laiha, nasaun ne’e atu fo dignidade ba ita nia veteranus ne’e fo oinsa los, familia sira hateten katak, membru Governu ida mak mate ka deputado ida mak mate buat hot-hotu prontu, ema hotu halai tun sa’e hodi prepara fatin, maibe veteranu ida mak mate toba hanesan los animal ida.

“Ba hau sente triste teb-tebes se Governu la fo dignidade ida masimu ba ita nia veteranu sira, nasaun ne’e hari’i husi veteranu sira, pior liu maka mate isin hodi ba to’o ona nia rain moris fatin mos laiha Governu ida ninia prejensa, ho ida ne’e atu husu deit Ministeriu Sosial ne’e halo deit saida, ministeriu sosial atu hare deit membru Governu sira, veteranu ne’e mate tanba deit sofre bala musan desde luta ba rai ida ne’e, maibe nia mate laiha atensaun ida husi Governu,” dehan Castro.

Manuel Castro husu ba Governu labele halo diskriminasaun ba veteranus no membru Governu, veteranus ne’ebe luta durante tinan 24 nia laran iha ailaran sura ho liman deit, la’os rihun ba rihun ne’ebe tau atensaun labele, Governu ida muda ba Governu ida mais hanesan deit.

Manuel Castro haktuir katak, momentu atu tula mate isin saudozu Liter nian ba iha nia rain moris fatin Municipiu Baucau laiha ambulancia, tanba ne’e maka Xefi Estado Maior General das Falintil-Forsa Defeza Timor-Leste (F-FDTL), Major General Lere Anan Timur haruka tula deit ho ambulancia militar nian, maibe ema balun dehan katak tula ho ambulancia militar nian kontra lei, maibe Major General dehan kontra lei karik bele kastigu nia.

Reprezentante povu ne’e husu ba Governu atu atensaun no dignifika herois sira ne’e ninia kontribuisaun durante luta, tanba sira nia luta mak ohin loron nasaun ne’e la’o diak no sira ba tur iha Governu, no fo atensaun ba Governu akontesementu ne’e primeiru no ultimu labele akontese tan.

Biban ne’e,  deputada Albina Marçal hateten katak nia parte lakomprende ho situasaun ne’e, tanba saida mak tenke akontese hela deit ba veteranu sira.

“Hau lakomprende tanba saida mak akontese hanesan ne’e, hau sei lebra hela katak hari’i komisaun ida ne’ebe mak inklui mos ba veteranus sira atu hare ba asuntu ida ne’e, inklui iha komisaun ne’e maka Ministeriu Sosial no Ministeriu saude, maibe tansa mak akontese fali hanesan ne’e, li-liu ba veteranus sira, mais atu hateten deit katak tanba veteranus sira mak har’i nasaun, nasaun ne’e hari’i iha ruin no ran nia laten,” dehan nia.

Saudozu Cesario Ximenes “Liter” mate iha Domingo kalan iha HNGV iha momentu ne’e kedas hodi ba ninia rain moris fatin, Municipiu Baucau no iha Tersa loraik (14/06/2016), familia hodi mai halot iha Jardim dos Herois Metinaro.mia

Jornal Nacional