XANANA HAHU “FUNU FOUN” HUSI OECUSSE

Komandante Supremu das FALINTIL, Kay Rala Xanana Gusmão, atual Xefi Negosiador  Fronteira Maritima no nudar mos Ministru Planeamentu no Investimentu Estratejiku (MPIE), hahu  dau-daun “funu foun” husi Oecusse atu bele rezolve lalais fronteira terrestres no maritima ho Indonesia no Australia.

“Uluk hau kaer funu ne’e, hahu husi Tutuala ba Oe-cusse, agora funu foun ne’ebe atu haree ba fronteira maritima tenki husi duni Oecusse mak ba Tutuala,” afirma Xanana Gusmão, bainhira debate pakote lei ordenamentu teritoria iha Parlamentu Nasional (PN), Kinta (23/06/2016).

Lider karismatiku ne’e afirma tan katak, negosiasaun  fronteira maritima ho Indonesia tenki hahu husi Oecusse,  Batugade, Atauro too iha Tutuala hodi defende soberania Timor Leste nian hanesan nasaun.

Iha fatin hanesan Vise Prezidenti Bankada FRETILIN,  Francisco Miranda Branco, alerta katak, kna’ar ne’ebe Estadu Timor-Leste fo fiar ba Xanana Gusmão, importante tebes atu sai negosiador prinsipal ba fronteira maritima entre Timor-Leste ho nasaun Vizinu hanesan Australia no Indonesia.

“Xefi negosiador Xanana Gusmão hakarak fo mensagen ba ita hotu, tanba ita sei falta 5% ho Indonesia atu determina fronteira rai maran ita nian ho Indonesia,” hateten Francisco Branco.

Reprezentante povu iha uma fukun PN ne’e argumenta  katak, negosiasaun ne’e presiza Timor oan hotu nia luta ba direitu hodi termina limitasaun fronteira maritima ho nasaun vizinu.

Kona-ba konseitu  negosiasaun fronteira nudar ‘funu foun’ ba Timor, Deputadu Francisco Branco hateten, negosiasaun ne’ebe iha hanesan esforsu hodi termina fronteira maritima, tanba negosiasaun fronteira la fasil.

Vise Prezidente Komisaun A PN Arão Noe de Jesus, sublinha mos katak,  negosiasaun fronteira hahu husi Oecusse, tanba iha Oecusse fronteira rai maran seidauk konklui iha pontu rua hanesan Naktuka ho Pasabe.

“Ita koalia negosiasaun fronteira tasi tenki mai husi parte ida ne’e mak iha Oecusse nune’e ita bele la’o to’o iha Tutuala tan ne’e hau konkorda,” dehan deputado Arão.

Deputado bankada CNRT ne’e sublinha tan katak, Oecusse hanesan pontu inisial hodi hahu halo negosiasaun, tanba fronteira Terestre seidauk  termina, maibe negosiasaun ne’e lafasil nune’e sei lori tempu. mia

Jornal Nacional