Dinámiku, Sosiedade Sívil Iha Timor-Leste

DILI (ANTIL) – Organizasaun Sosiedade Sívil iha Timor-Leste dinámika tebes iha prosesu konstrusaun estadu.  Governu mós rekoñese organizasaun naun governamental sira-nia papél importante tebes, hahú kedas husi independénsia to’o agora.

Primeiru Ministru, Rui Maria de Araujo hato’o ida-ne’e iha nia diskursu ba Forum Sosiedade Sivil ASEAN iha Dili, Kuarta-feira (3/8).

“Entre sosiedade sivil no Governu, presiza nakloke ba malu no rona malu, atu iha parseria di’ak hodi kontribui ba prosesu  dezenvolvimentu. Presiza ema hotu nia partisipasaun iha konstrusaun estadu no nasaun,” PM hateten.

Fórum sosiedade sivil ASEAN, tuir Primeiru Ministru,  sai opurtunidade ida atu partilla infromasaun kona-ba relasaun entre sosiedade sívil ho governu Timor-Leste.

Hein katak esperiensia ne’ebe mak ita fahe husi membru organizasaun sosiedade sívil sira sai hanesan pontu reflesaun wainhira sira fila ba sira-nia nasaun, Primeiru-Ministru hateten.

Maske dalabarak organizasaun sosiedade sívil halo krítika ba Governu, PM Rui konsidera hanesan obstaklu ida atu infrenta.

Entertantu Prezidente Parlamentu Nasionál, Aderito Hugo da Costa mós rekuñese sosiedade sivil nia papél durante ne’e, la’os de;it iha nivel nasionál maibé nivel ASEAN no mundial.

“Luta ba fronteira maritima entre Timor-Leste ho Australia mós sai luta sosiedade Sivil nian. Husu ba sosiedade sivil atu hametin rede ida-ne’e, atu efetivu di’akliu tan iha futuru,” Hugo dehan.

Timor Leste estabelese lei Sosiedade Sivil desde tinan 2004. Iha tinan 2008, anualmente Governu Repúblika Timor-Leste (RDTL) aloka fundu ba Sosiedade Sivil, hodi halo sira-nia atividade sira iha komunidade nia leet.  (jornalista Zezito da Silva/editor: Lidia Neves)