Aprende Teória Hodi Tau Prátika iha Komunidade

DÍLI, (ANTIL) - Reitór Universidade Nacional Timor Lorosa’e (UNTL), Francisco Miguel Martins hatete katak durante tempu barak estudante aprende ona teória iha universidade maibé presiza aprende mós prátika iha komunidade hodi hatene problema sosiál ne’ebé akontese iha komunidade.

“Prátika iha komunidade nia leet tuir teória no esperiénsia ne’ebé hetan iha universidade. Aprende hanesan, estuda hanesan, hala’o mós hanesan ba komunidade,” afirma reitór UNTL perante estudante no lider komunitáriu sira bainhira halo enseramentu ba estudante estajiáriu Fakuldade Filozófia (FF) iha suku Bidau Santa Ana, foin lalais ne’e.

Reitór ne’e mós afirma katak estájiu no servisu sosiál la’os projetu nomós estudante estajiáriu sira la’os emprezáriu tanba ne’e sira la iha osan. Osan ne’ebé sira iha ne’e inan-aman mak fó osan hodi halo projetu ho komunidade maibé oinseluk ho emprezáriu.

“Emprezáriu lori sira nia osan manan projetu. Estudante lori nia kakutak mai atu aprende, fó solusasaun di’ak aprende husi komunidade, fó solusaun hasai dúvida husi komunidade sira oinsa mak ita dezenvolve suku no aldeia,” reitór subliña.

Reitór Francisco Miguel Martins hatutan, durante estudante sira tuun ba baze halo estájiu, semana ida halo observasaun no identifikasaun kona-ba problema saida de’it mak suku iha hanesan problema saúde, ambiente, edukasaun no buat seluk tan hodi buka implementa.

Entretantu kona-ba modalidade estájiu, komparasaun ho anteriormente, estájiariu sira kompostu husi modalidade oioin maibé iha tinan ida ne’e modalidade idaidak de’it katak área ka fakuldade ida de’it mak halo estájiu tanba ida ne’e programa interdisiplinár no intersektorál katak ita la iha kbiit finanseira maibé aproveita kbiit seluk, poténsia ema seluk para hala’o atividade, implementa programa tuir nesesidade ne’ebé mak iha.

Semana ida tuir mai, trasa programa bazea ba identifikasaun problema ne’ebé iha, halo matriks, tuir mai elabora tan matriks planu implementasaun programa no halo kaderneta diária.

“Ida ne’e prosesu aprendijazen ne’ebé hala’o iha komunidade nia leet. Iha estájiu nia laran ita bele aprende oinsa identifika problema, observa no hakerek problema. Problema sira ne’e sai problema ka nu’udar guia atividade. Tanba ida ne’e mak universidade haruka estudante mai atu aprende iha komunidade nia leet,” tenik reitór UNTL, Francisco Miguel Martins.

Reitór haklaken tan katak bainhira gradua, taka ona “sapeo metan” hatene buat hothotu ne’e filozofia de’it, tanba ema ida labele domina área hothotu, ezemplu hanesan saúde, ambiente no seluk tan.

Nune’e mós bainhira gradua husi universidade sei hasoru nafatin obstakúlu tanba ne’e nia husu atu aprende nafatin, tanba aprende ne’e nunka para ka eterna só mate mak bele hapara.

Atu konklui, reitór ne’e apresia no hateten katak louva ho aprendijazen estudante sira nian no misaun sira ne’ebé hala’o iha komunidade nia leet  tanba ida ne’e hanesan bukae ida ba iha ita nia moris tomak.

Bainhira la estájiu signifika la hatene probema sosiál mezmu ke inan-aman iha suku no mai husi suku la ho sistematiza ruma ita fila ba suku sei la hatene buat ida. (Jornalista: Rafy Belo / Editora: Rita Almeida)

Foto: Reitór Francisco Miguel Martins