Instituisaun Independente Tenke Akompaña Lalaok Eleisaun Suku

DILI, (ANTIL) – Xefi Suku Komoro, Postu Adminisrativu Don Aleixo, Munisípiu Dili, Eurico da Costa de Jesus husu atu ema independente hanesan Komisaun Nasionál ba Eleisaun tenke akompaña lalaok eleisaun suku hodi prevene irregularidade iha prosesu.

”Ha’u sujere atu tau ema ida netrál hodi akompaña lalaok eleisaun, para redus hanoin oioin nomos irregularidade iha prosesu eleisaun”, autoridade lokál ne’e ba ANTIL iha Tribunál Distritál Dili, Tersa, (20/9).

Kandidatu ne’ebé aprejenta ona ninia kandidatura mak hosi partidu Kmanek Haburas Unidade Timor Oan (KHUNTO).

Nu’udar kandidatu partidu FRETILIN ba periodu anterior, Eurico da Costa de Jesus dehan, hakarak re-kandidatu hanesan independente hodi sukat povu ninia fi’ar ba kandidatu ne’ebé kandidata-án.

”Husik rezultadu hatudu oinsá, ema hotu tenke respeita demokrasia, respeita ema nian liberdade hodi eskolla”, afirma.

Dadaun ne’e, nia informa, seidauk iha kandidatu feto ida mak hakarak kandidata-án ba xefi suku Komoro ho razaun Komoro hanesan área konflitu ne’ebé loron ba loron sempre mosu problema oioin.

Tuir nia haree, sistema eleisaun liu-hosi konsellu suku di’ak, maibé ninia la-di’ak mak konsellu suku sira mak hili malu e la’ós hili hosi povo sira.

”La’ós povo mak hili, ikus mai ema bele hatete katak ami kong kali kong mak hodi hili malu”, katak  nia.

Ho mudansa kalendáriu hosi 30 Setembru ba 29 Outubru, tuir nia, di’ak tanba bele fó tempu ba ministériu relevante hodi halo sosializasaun lei númeru 9/2016 kona-ba eleisaun suku ba komunidade sira, liliu kandidatu sira  atu hatene di’ak liu tan prosesu kandidatura ba eleisaun.(jornalista: Rita Almeida)

Foto: Xefi Suku Komoro, Postu Adminisrativu Don Aleixo, Munisípiu Dili, Eurico da Costa de Jesus halo intervista ho jornalista sira iha Tribunál Distritál Dili, Tersa, (20/9). Foto ANTIL/Rita Almeida