Siklista Feto Timor Hetan Prestasaun Di’ak iha Kategoria Internasionál

QUELICAI, (ANTIL) - Siklista feto timoroan na’in rua tama iha désimu lugár (sepuluh besar) kategoria internasionál feto iha Tour de Timor Stage II Manatuto-Quelecai ho distánsia 92.5 km.

Siklista na’in rua ne’e maka Maria Loua Marçal Soares ho númeru kompetisaun 165 no Domingas Catarina Guterres (164). Maria nu’udar nunu lugár (urutan ke sembilan) to’o iha finish ho durasaun tempu oras haat (4:51:09.10) no Domingas nu’udar désimu lugár ho durasaun tempu oras haat (4:51:16:10).

Siklista Domingas informa katak nia senti kontenti tebes bainhira hetan prestasaun ida ne’e. “Ha’u senti kontenti loos tanba hetan rezultadu di’ak,” nia dehan ba ANTIL iha Postu Administrativu Quelecai, Munisípiu Baucau, Kuarta (14/9).

Tuir nia katak prestasaun désimu lugár ne’ebé nia hetan la’ós fásil maibé liuhusi serbisu todan ida.

“Ne’e liuhusi serbisu ida boot maka ha’u hetan. Ohin ha’u ho ha’u nia alin serbisu hamutuk maka nia hetan nunu lugár no ha’u hetan désimu lugár,” Domingas haktuir.

Nia dehan, en-jeralmente buat hotu la’o di’ak hosi Manatuto mai Quelicai, soké problema oituan ne’ebé nia hasoru maka primeiravez nia liu iha rute refere entaun nia konfuzaun. Antes ne’e, Domingas tanis tanba la hetan prestasaun di’ak iha Stage I Dili-Manatuto ho distánsia 82.5 km, Tersa (13/9). (Jornalista: Xisto Freitas / Editor: Gantry Meilana)

Foto: Siklista feto iha kategoria internasionál hosi primeiru to´o désimu lugár simu prémiu hafoin kompete iha Stage II Manatuto-Quelicai ho distánsia 92.5 km, Kinta (14/9). Foto ANTIL/Xisto Freitas