Veteranus Tane Liman Ba Emprezariu Internasional, Hatun Dignidade Veteranus

DILI – Membru Parlamentu Nasional (PN) husi bankada CNRT Agostinho Lay hateten, veteranus neebe maka atu hetan projetu ba tane liman ba emprezariu Internasional, nee hatun dignidade veteranus sira nian, tanba naran veteranus nee presiza dignifika.

Nia dehan, naran ida veteranus nee laos fo ba ema arbiru deit, maibe ema neebe maka halo sakrefisiu no karidade durante prosesu libertasaun ida nee.Tanba nee husu emeprejariu internasional atu respeita veteranus sira, laos veteranus maka hakruk fali ba sira.

Veteranus nee tenke tau aas oituan, Governu labele haruka  ita nia veteranus sira ba hakruk tane liman fali ba emprezariu estranjeiru sira, hodi hetan konsersiu ba projetu ruma iha ita nia rai laran , tanba nee hatun deit dignidade ita nia veteranus sira nian ,” dehan deputadu Agostinho ba STL, iha PN, Dili, Sesta (16/09/2016).

Iha fatin hanesan Veteranus Jacinto Viegas alias Roky hateten, iha veteranus ida rua maka hakruk ba emprezariu Internasional sira hodi hetan projetu, laos veteranus hotu. Veteranus Jacinto atual deputadu husi bankada CNRT nee lakonkorda ho veteranus sira neebe maka hakruk ba ema emeprjariu internasional, tanba nee hatun dignidade veteranus sira nian.

Entretantu Koordenador veteranus Munisipiu Ermera Antonio dos Santos alias 55 hateten, veteranus iha nia dokumentu kompania nee nia nunka ba hakruk ba kompania internasional, kompania internasional sira dala ruma buka parseiru ho veteranus sira atu hetan benefisia ba sira nia aan. Informasaun kompletu iha STL Jornal no STL Web, edisaun Sabado (17/9/2016). Carme Ximenes

Suara Timor Lorosae