BOMBA GRUNDFUS KOÑESIDU IHA MUNDU

Diretór Kompañia Nasionál Paya’s Sister’s, Enjeñeiru António Amaral da Silva hateten katak, produtu bomba bee (bomba Grundfus), husi PT Grundfus Pompa, ne’e koñesidu tebes no kualidade di’ak liu iha mundu. Nune’e oras ne’e dadaun Paya’s Sister’s Co. Unip. Lda, mak sai hanesan ninia dealer autorizadu iha Timor Leste (TL).

“Grundfus nu’udar bomba ne’ebé mak oras ne’e dadaun koñesidu tebes iha mundu no iha kualidade ne’ebé di’ak liu ka númeru um iha mundu, tamba ne’e mak ita nia Governu, liu husi Servisu Água no Saneamentu (SAS), hakarak uza nafatin bomba Gundfus to’o agora hodi halo forñesementu bee ba Timor laran tomak,”esplika António ba JN-Diário, Kinta, (29/09), wainhira partisipa iha Díli Expo Internasional, iha Centro Convencões de Díli (CCD).

António hatutan katak, desde Indonesia nia tempu to’o agora ne’e, Timor-Leste uza bomba Grundfus ne’ebé ninia orijin husi nasaun Dinamarka no espalla ona iha mundu tomak hanesan produsaun bomba númeru um iha mundu no ho oportunidade ba partisipasaun iha expo ida ne’e, sira sei públika ba Timor tomak produtu Grundfus nian. No expo ida ne’e bele fó benefisiu ba Timoroan tomak, liu-liu ba emprezáriu Timoroan sira, tamba bele hatene hili sasan ne’ebé mak ho kualidade di’ak no hatene produtu sira ne’e nia orijin.

António fundamenta katak, Ministéiu Comércio Industria no Ambiente (MCIA) mós tenki serbisu maka’as liutan para públika ba povu Timor tomak konaba expo internasional ne’e, tamba expo ida ne’e kuaze nasaun 15 mak partisipa no realiza tinan ida dala ida de’it, maibé povu barak ladun hatene no parte Governu nian mós ladun ba partisipa barak.

“Paya’s Sisters ami nu’udar produtor, eventu sira hanesan ne’e ami partisipa nafatin, ami nu’udar dealer, no kuaze iha Timor tomak ne’e uza ami nia produtu, ami sei esplika nafatin ba komunidade hotu, Governu no ba sira hotu ne’ebé mak oras ne’e dadaun uza ami nia produtu, ami iha responsabilidade tomak ba ami nia produtu,” afirma António.

Entretantu Regional Sales Manager PT Grundfus Pompa, Primus Yeremias Gonstary hateten katak, expozisaun internasionál sira hanesan ne’e, Grundfus partisipa dala barak ona, maibé iha TL ne’e foin maka pela primeira vez, liu husi ninia dealer autorizadu Kompañia Paya’s Sisters ne’e para bele aumenta liu tan merkadu iha TL, liu-liu ba konsumedores bomba sira nian.

“Entaun ami marka prezensa iha expozisaun industria ne’e hanesan meius ida atu hakbesik-an, liu-liu ami nian produtu sira ba komunidade sira iha Timor”, informa Yeremias Gonstary.

Nia hatutan katak, bomba sira ne’ebé mak nu’udar produtu Grundfus nian ne’e hahú husi bomba sira ne’ebé ho kapasidade ki’ik to’o bomba sira ne’ebé mak iha kapasidade boot.

Yeremias Gonstary sente haksolok, tanba Grundfus mós hetan atensaun husi komunidade iha TL.

“Espera katak, ba oin Grundfus nia produtu kualidade sira kontinua iha komunidade sira nia  fuan”,  Yeremias Gonstary dehan.ías

Jornal Nacional