Isabel: Moe La Satan Dalan, Hodi Hetan Osan

“Tristeza ne'ebé ita hetan ohin loron,

se sai furak no midar bainhira ita hanoin fila fali, aban-bainrua”

LIA fuan murak ne'e merese duni atu deskreve feto ida ho naran Isabel da Costa Gomes (tinan 16) nia moris.

Kinta (06/10), bainhira olatimornews.com hasoru Isabel iha Taibessi, nia halo hela ninia servisu loro-loron, iha kompañia ida ho naran Leão Cento.

Oan datoluk hosi biin no alin na'in 7 no mane na'in 1 ne'e dehan, moe la satan nia dalan atu bele hetan osan, hodi sustenta nia familia no selu nia eskola.

"Ha'u la moe ho ha'u nia servisu agora. Tanba, ho ida ne'e mak ha'u bele selu ha'u nia eskola no selu mikrolet ba eskola loro-loron. Ha'u na’ok hodi selu ha'u nia eskola, mak ha'u moe," dehan oan feto husi Marino da Costa Gomes no Agida Dos Santos ne'e ho hamnasa midar.

Dadeer tuku 07.00 de'it, Isabel tenke hakat ona ba kompañia Leão Cento. Isabel hahú ninia servisu.

Bainhira ponteiru oras iha didin lolon fatin servisu, hatudu tuku 12.00 meudia, Isabel tenke hapara servisu. Nia fila ba uma. Prepara an ba eskola, to'o tuku 04.00 loro-kraik.

Isabel tuur iha klase 2 Ensino Secundaria 5 de Maio. Nia la sente moe, bainhira ninia kolega eskola sira hatene, saida mak nia halo molok atu ba eskola no mós bainhira fila hosi eskola.

“Ha'u moe halo saida? Moris mak nune’e duni ona. Se lae, ha'u labele eskola,” hateten feto isin lotuk, metan morena ne'e.

Fila hosi eskola, Isabel sei kontinua nia servisu, to'o rai nakaras. “Ha'u nia inan ho aman, kbiit laek atu satan ami na'in 8 nia moris loro-loron. Ha'u presiza ajuda sira ho atividade ida ha'u sente bele duni atu halo, hanesan ne'e,” Isabel haktenik.

Iha kompañia Leão Cento, Isabel servisu hamutuk ho ninia maluk feto na'in 3. Sira mós estudante hotu. Loro-loron sira fase motor no mós karreta. Kada fulan, sira simu $100 hosi kompañia na'in.

“Bainhira hahú servisu iha ne'e, ha'u sente kole duni. Maibé, agora toman ona,” Isabel hateten ho hamnasa. (*)

Chay, Olatimornews.com – Editór: Alexandre Assis - Foto: Isabel da Costa Gomes fase hela karreta. (Olatimor Foto/Chay)

LEE LIU OLÁ TIMOR NEWS