PNTL hala’o Estudu Komparativu iha Bali Indonezia

DILI, (ANTIL) - Ofisial Polisia Suku (OPS) Polisia Nasional Timor-Leste (PNTL) nain 30 hala’o estudu komparativu iha BIMNAS Bali Indonezia hodi aprende no aumenta koñesementu kona-ba lalaok polisiamentu Komunitaria.

Komandante Operasaun Superintendente Xefe Henrique da Costa hateten, Estudu komparativu ne’ebé maka hala’o ho nia objetivu atu aprofunda liutan konhesimentu membru OPS sira nian hodi nune’ebe bele dezenvolve no servi komunidade ho diak liutan. Nia hato’o asuntu ne’e hafoin enkontru ho membru OPS sira iha kuartel Jeral Kaikoli Dili foin lalais ne’e.

Nia informatan katak Estudu komparativu ne’ebé maka hala’o durante loron 5 nia laran hahu husi loron 10 to’o 15 fulan Outubru sei foka liu konaba vijita ba eskola, vijita ba uma komunidade nian , oinsa atende no simu keisa husi komunidade sira no rezolve problema ne’ebé maka mosu.

Komandante operasaun ne’e husu ba membru sira atu aproveita didiak estudu komparativu ne hodi aprende lisaun ruma ne’ebé diak husi polisia BINMAS Bali konaba oinsa inplementa servisu polisia komunitaria nian no hein katak ho estudu komparativu ne’e bele sai hanesan sasukat no refensia ida atu motiva sira hodi dezenvolve instituisaun PNTL liu-liu hala’o servisu polisia komunitaria ho diak liutan.

Entretantu liu husi enkontru preparasaun reprejentante Ajensia Polisia Nasional Japaun husu ba membru OPS nain 30 ne’ebé maka partisipa iha estudu komparativu ne’e atu aproveita oportunidade ida ne hodi aprende ho susesu tanba programa ne’e interesante no membru hirak ne’e reprenta nasaun Timor-Leste no fila mai bele inplementa iha servisu polisia Komunitaria ho diak liutan.

Programa estudu komparativu ne’ebé maka hala’o durante loron 5 ne’e hetan suporta husi parseru Ajensia Polisia Nasional Japaun no eskola BIMNAS Bali hanesan fatin atu aprende tanba distansia besik, sira nia esperensia inplementa servisu polisia komunitaria kleur ona no sira mos suksesu iha sira nia servisu, Aliende Bali estudu komparativu ne’e hala’o ona iha Bekasi Indonezia, Japaun, no Nova Zelandia hodi hare dezenvolvimentu polisia komunitaria iha nasaun hirak ne’e. (Jornalista: Manuel Pinto / Editor: Alberto Alves)