Lu-Olo Hein Desizaun CCF Kandidatu Ba Prezidente Repúblika

Hafoin ramata IV kogresu Nasionál Partidu Frente Revolusionáriu de Timor Leste Independente (FRETILIN), Fracisco Guterres seidauk deklara-án atu kandidata ba Prezidente da Repúblika periodu 2017-2022 tanba sei hein desizaun Komite Sentral Fretilin (CCF).

“Atu hatete katak atu serbisu ba ha’u nia partidu, ha’u nia rai ne’e ha’u prontu, maibé ida kandidatu ninian ne’e so ba komite sentral maka deside iha tempu badak ida, antes Dezembru kandidatu sai ona,” Prezidente partidu FRETILIN, Francisco Guterres Lu-Olo hatan ba Jornalista sira bainhira ramata enseramentu IV kongresu Nasionál FRETILIN iha Sentru Konvensaun Díli (CCD), Domingu, 09/10/2016.

Iha kongresu ba dala IV, partidu FRETILIN hasai mós rezolusaun ida kona-ba kandidatura FRETILIN nian ba Eleisaun Prezidensial, maibé hafoin deskute iha forum kongresu nian, deside katak entrega hikas ba CCF maka sei toma pozisaun iha tempu badak molok tinan foun 2017.

Eis Guerilleiru ne’e esplika kongresu seidauk deside, sei hameno hela ba komite sentral eleitu. Iha tempu oin sei reuni para atu bele hare ida ne’e. Lu-Olo garante katak mais ou menus to’o Dezembru antes tinan foun bele fó sai ona sé maka atu kandidatu FRETILIN nian.

Sekretáriu Jerál FRETILIN, Mari Alkatiri hatete iha 2017 laiha tan ona kandidatu seluk atu kompete ho kadidatura FRETILIN ninian. Nia dehan kandidatura FRETILIN maka sei manan iha Eleisaun Prezidensiais.

“Ita seidauk deside sé maka atu sai kandidatu ba Prezidente da Repúblika, maibé ita iha garantia katak 2017 ita nia kandidatu sei manan,” Alkatiri hato’o kestaun ne’e bainhira ensera IV kongresu Partidu FRETILIN nian. (Efrem)

Matadalan