Fitar
kle'uk no klean ne'ebé maka Alex Samurai hetan iha kelen karuk hanesan de'it
fitar ida entre fitar tolu iha isin, lian permanente sira hosi soldadu
indonéziu sira nia tiru iha rate timoroan Santa Cruz iha loron 12 Novembru 1991.
"Iha
loron ne'ebá ha'u iha muru leten ho ema sira seluk bainhira militar sira hahú
tiru. Tiru kona ha'u no monu ba rate laran. Ha'u hetan tiru tolu, iha ain, iha
kotuk-laran no iha kabaas", nia konta ba Lusa bainhira hariik iha foto
boot ida ne'ebé hatudu nia fitar ne'ebé halo parte iha espozisaun fotografia
ida ne'ebé inaugura iha loron-kinta ne'e iha Rate Santa Cruz, iha Díli.
Ohin
loron Alex Samurai hanesan inspetor iha Polísia Nasional Timor-Leste (PNTL) -
agora daudaun halo parte iha seguransa pesoal hosi primeiru-minitru - hanoin
hikas momentu ne'ebé husik ba nia marka ida ba nafatin.
"Ha'u
labele halai. Ema barak halai no hahú reza. Militar sira hahú tama no lori
mate-isin sira. Sira lori ha'u ba estrada. Hafoin ne'e hasai ha'u nia kamiza.
Iha tempu ne'ebá ha'u uza farda eskola nian. Lori ha'u ba kamiaun militar ida
nia laran no lori ha'u ba ospital militar", nia hanoin hikas fali.
"Fitar"
hanesan espozisaun nia naran ne'ebé maka halibur imajen hamutuk 32 hosi fitar
sira iha sobrevivente sira hosi masakre ne'ebé koñesidu liu iha istória
Timor-Leste nian ne'ebé halo tinan 25 iha loron-sábadu ne'e.
Elvis
de Oliveira hanesan reprezentadu seluk, iha imajen forte ne'ebé hatudu fitar
hosi ko'a vertikal ida ne'ebé halo ho baioneta ne'ebé fitar ne'e hahú hosi
husar no hotu iha besik parte fuan nian.
"Ha'u
hetan pontu 24. No iha tan rua iha ulun", nia esplika hodi hatudu ba
imajen. Militar sona nia, nia lakon sentidu no bainhira nia hadeer nia iha
ospital militar nia laran.
Autór
hosi imajen sira maka Bernardino Soares, fotógrafu timoroan ne'ebé iha tinan
ne'e bainhira soldadu indonéziu sira oho ema besik na'in 300 no sai koñesidu ho
naran masakre Santa Cruz, iha loron 12 Novembru 1991.
"Milímetru
ida hosi fitar ida iha istória, iha moras. Fitar marka kanek ida nia rohan
maibé iha kazu ne'e ita uza fitar hodi hahú tama iha istória 12 Novembru nian
no iha personajen sira ne'e", esplika hosi Bernardino Soares ba Lusa.
Nia
esplika katak ne'e permiti konta istória 12 Novembru nian ho dalan seluk, fó ba
vítima sira fatin hodi hanoin saida maka akontese no hodi transmiti memória
ne'e ba sira ne'ebé joven liu.
"Sobrevivente
sira nunka hatudu sira nia fitar sira. Iha-ne'e, tuir sira nia hakarak rasik,
hatudu fitar sira. Sira hakarak hatudu no konta nia istória", nia hatete.
"Hanesan
oportunidade ida hodi ko'alia mós kona-ba fitar sira klamar nian. Hodi hamoos.
Ne'e la'ós hanesan espozisaun ida maibé hanesan fahe ida. Bainhira hatudu foto
sira, fitar sira sei hanesan mós ba ema tomak nian no sira, sobrevivente sira,
sei senti kmaan liu, tuir ha'u nia hanoin", nia hatete.
Iha
loron-kinta ne'e, iha rate Santa Cruz, halibur ona imajen hamutuk 32, taka ho
hena metan sira ne'ebé depois maka loke - sobrevivente ida-idak inaugura nia
imajen - hodi hatudu ba públiku, ba dala uluk iha kazu barak, marka sira ne'ebé
hetan iha tinan 25 liubá.
"Ha'u
iha tinan neen. Ha'u sei hanoin. Ha'u rona barullu no rona saida maka akontese.
Ha'u haree vítima balun, tiu balun no viziñu sira ho raan. Iha ha'u nia tinan
iha iha impaktu psikolójiku no entre joven sira mosu sentimentu ida violénsia
nian, vingansa nian", nia hanoin.
"Sentimentu
ne'e sai hanesan inimigu ida iha ami nia laran. Ha'u konsege liberta aan hosi
sentimentu ne'e, hosi hahalok vingansa no sira seluk", nia esplika.
Ideia
hodi rejista fitar sira hosi sobrevivente sira mosu iha tinan tolu liubá maibé
iha de'it fulan ne'e liubá, iha konversa ida ho Komité 12 Novembru, maka
hametin projetu ne'e no hahú kontaktu dahuluk sira.
"Agora
hamutuk 32. Maibé sei iha barak. Ne'e hanesan faze dahuluk. Ami hahú ho imajen
32 ne'e maibé ami hakarak liután, karik ho rejistu ida permanente liu ka livru
ida", nia esplika.
Gregório
Saldanha, prezidente hosi Komité 12 Novembru, halo mós parte entre fitar sira
ne'ebé hatudu, iha nia kazu maka fitar iha kidun-tahan ne'ebé ohin loron halo
moras no halo nia susar hodi toba.
"Hanesan
importante tebes hatudu fitar sira, marka permanente sira iha ami nia isin.
Hodi hanoin momentu sira hodi labele repete no atu labele halo fali ema seluk
terus", nia hatete ba Lusa.
"Ami
hanoin mós fitar sira hanesan marka ida ne'ebé fó hanoin trajédia, hodi hatete
mai ami katak ami tenki kontinua dezenvolve Timor-Leste hodi sai nasaun di'ak
ida, evita halalok violentu sira. Ami hanesan referénsia hodi harii timor di'ak
ida", nia hatete.
SAPO
TL ho Lusa - Tradusaun hosi artigu ne'ebé hakerek hosi António Sampaio (Lusa) –
Foto 1: Alex Samurai. Foto@ Acácio Pinto/Lusa – Foto 2: Autór hosi imajen sira,
fotógrafu Bernardino Soares. Foto@ Acácio Pinto/Lusa
Sem comentários:
Enviar um comentário