PR TAUR: SOSIEDADE FORTE, EVITA ABUZU PODER NO PREPOTENSIA

Prezidenti Repúblika (PR), Taur Matan Ruak hatete katak, sosiadade forte, tenki evita abuzu poder no prepotensia iha nasaun ida ne’e.

“Sosiedade forte, di’ak ba nasaun, ho sidadaun ida klaresidu liu ne’e, evita iha abuzu de poder, prepotensia iha nasaun ida,” dehan PR Taur Matan Ruak iha nia intervensaun iha selebrasaun loron internasionál direitus humanus ne’ebé hala’o iha Palácio Prezidensial Repúblika Nicolau Lobato Aitarak Laran Díli, Sábadu (10/12).

Xefi Estadu ne’e hatutan katak, ONG JSMP organizasaun ida ne’ebé la’os de’it aseita no konfirma buat ne’ebé ema halo, maibé li-liu hetan korajen para hatete ba ema, li-liu autoridade sira, buat ne’ebé labele halo, i ida ne’e importante liu fali, para evita sosiedade ida ne’ebé konprimidu demais.

“Ne’e honra bo’ot ida ba ha’u, partilla ho ita bo’ot sira, entrega prémio Sergio Vieira de Mello iha loron direitus humanus, eventu ne’ebé halo tin-tinan,” katak Taur Matan Ruak.

Eis Jeneral ho fitun rua ne’e afirma, premio ne’e, hahú kria husi eis Prezidenti Repúblika, Ramos Horta iha tinan 2008, hodi fó rekoñesementu ba sira ne’ebé ho sira nia atividade no esforsu, kontribuisaun i ajuda sira seluk ne’ebé presiza, tau matan ba ema sira ne’ebé presija iha Timor Leste.

Xefi Estadu ne’e haktuir, premio direitus humanus ne’e, promove inisiativa servisu komunidade nian, partisipasaun sidadaun sira, no organizasaun sosiadade sivil, ne’ebé importante tebes, hodi hametin direitus humanus iha Timor Leste.

“Partisipasaun sidadaun iha ita nia nasaun, konsolidade ita nia instituisoens iha ita nia rain, nomós servisu atu hametin paz, ne’e prioridade ba ita tomak, no ba Timor-oan tomak,” katak Taur Matan Ruak.

Nia hatutan, respeitu ba direitus humanus ema hot-hotu nian, kondisaun importante ida atu hametin paz, harmonia social, no partisipasaun sidadaun nian iha dezenvolvimentu rai laran, no dezenvolvimentu  ekonómika no konstrusaun instituisaun ne’ebé demokrátikus  iha Timor Leste.

Taur Matan Ruak esklarese, premio ne’e mós, fó onenazen bo’ot, ba saúdozu Sergio Vieira de Mello, ema ne’ebé iha tempu difisil nia laran, nia lidera tranzisaun iha Timor Leste, ema ne’ebé  ho nia pasiensia, no ninia umanizsmu i nia dedikasaun, konsege lori tranzisaun  ida ne’ebé di’ak tebes mai Timor Leste.

Xefi Estadu ne’e dehan, Sergio Vieira de Mello ho nia kapasidade servisu ne’ebé rona ema, li-liu Timor oan sira ne’ebé esperensia  laiha, tanba primeira-ves tenta hari’i nasaun, hafoin sai husi konflitu ida naruk.

Nia realsa, ohin  rekuñese internasionálmente katak, tranzisaun nasoens unidas  halo iha Timor Leste, sosizidu Sergio Vieira de Mello ninia servisu.

Taur Matan Ruak relata, premio Sergio Vieira de Mello, distinki organizasoens no ema ne’ebé dezenvolve ninia atividades ba servisu komunidade, no kontribui ba hadia situasaun populasaun sira ne’ebé vulneravel iha formas oi-oin.

“Ita iha programa monitorizasaun Sistema Juridisial, ne’ebé kontribui hadia justisa iha ita nia rain, hetan dezempeñu di’ak. Programa ida ne’e, balu gosta no balu la gosta, tanba sira ibun bo’ot oit uan, maibé ha’u hanoin halo buat hotu para ita nia sistema la’o ho transparente no responsavel,” tenik Xefi Estadu ne’e.

 Alende ne’e, PR Taur Matan Ruak mós dehan, NGO Grasiana mós durante ne’e kontribui maka’as ba prosesu dezenvolvimentud iha Timor Leste.

“Ha’u espera katak, feto hot-hotu iha Timor Leste, bele tuir ita nia ezemplu, liki tiha dezafiu sira i hamrik la’o maka’as liu tan. Ita nia vida ne’e, vida ida partilladu, so iha sentidu katak, ita partilla ita nia domin ho ema seluk,” katak Taur Matan Ruak.

Nia hatutan, premio seluk ba  organizasaun religiaun sira ne’ebé mak durante ne’e hanorin sarani sira hotu iha Timor Leste atu hatene hadomi malu, no tane malu.

“ Amo Siku ho Amo Luis, ha’u se lembra foin lalais ha’u vizita Atauru, sira hatete katak, Prezidenti Repúblika, tanba saida mak  iha Timor ne’e, buat hotu nama-nama (neneik liu), ha’u dehan ba Amo Siku ho Amo Luis katak, ha’u sei iha Jeneral ha’u hakarak buat hotu la’o lais, mas ha’u mai tiha Prezidenti, ha’u mós nama-nama, ita nama-nama hotu,” hasara Xefi Estadu ne’e.

PR Taur espera katak, projetu ne’ebé mak Estadu atu halo iha Atauru ne’e, bele banati tuir saida mak Amo Luis ho Amo Siku halo iha Atauru.

Alende ne’e, Diretur Ezekutivu Judicial System Monitoring Program (JSMP), Luis Sampaio, ne’ebé hetan premio Sergio Vieira de Mello husi Estadu Timor Leste  loron direitus humanus ne’e, iha signifikadu bo’ot tebes.

Nia hatutan, PR Taur Matan Ruak konvida JSMP atu simu premio Sergio Vieira de Mello hanesan manan nain.

Luis Sampaio  hatutan, ida ne’e hanesan rekuñesementu ida ba saida mak durante ne’e JSMP halo, li-liu JSMP nia kontribuisaun iha setór justisa.

“Ema barak la kontenti, tanba ami koko atu dezafia polítika sira, ami koko atu divulga buat ne’ebé los, hanesan desizaun polítika sira ne’ebé mak Estadu halo, atu asegura katak, justisa ne’e fungsiona ba ema hot-hotu, nomós tratamentu igual ba tratamentu legislative iha Parlamentu Nasionál,” katak nia.

Luis Sampaio afirma, iha loron hirak ne’e, mundu tomak komemora deklarasaun direitus humanus, ne’ebé mak aprova husi Asemleia Jeral ONU, iha tinan 68 liuba.

“Uluk Timor oan sira luta maka’as duni atu hetan respeitu ba ita nia direitus humanus. Ita nia luta la saugati, restaurasaun independensia, haburas respeitu ba direitus humanus iha ita nia rai. Tanba ne’e mak, loron direitus humanus hanesan oportunidade ida atu fó omenazem, no dada ema nia atensaun ba povu ki’ik sira, feto no mane, ne’ebé lor-loron servisu no sakrifika sira nia aan, iha Suku hot-hotu nasaun ne’e nian,” tenik Luis Sampaio.

Nia afirma, PR Taur Matan Ruak vizita ona Suku hotu iha Timor laran tomak, no liu husi nia vizita ne’e, Xefi Estadu hetan oportunidade atu hakuak povu, hakbesik Estadu ba povu iha Suku hot-hotu.

Iha oportunidade ne’e mós, PR Taur lansa nia livru vizita Suku ida, ne’ebé hakerek husi João Aparicio.cos

Jornal Nacional