Maske Hetan Agresaun Hosi Membru F-FDTL, Nunura Husu Labele Repete

Lautem, (ANTIL) – Veteranus balun senti hakfodak no hirus, bainhira rona maluk veteran ida hetan agresaun fiziku hosi oknum membru F-FDTL, maski oknum ne’e hatene vitima ema veteranu ida. Problema nee’e akontese iha Subaun Ki’ik, 29 Novembru 2016.

Maski hetan agresaun fiziku, Mario de Sousa Guterres da Silva, veteranu ida ne’ebe konsidu ho naran Nunura, ho laran luak tuir prinsipiu luta uluk nian iha ai-laran ho laran malirin, kontinua fó perdaun ba oknum F-FDTL ne’e no fó hanoin ba membru hotu iha F-FDTL atu labele repete tan.

Kazu ne’e rezolve liuhusi dalan dame iha instituisaun F-FDTL, loron 6 Dezembru 2016.

“Foin Primeira vez, maka veteranos hamutuk ho F-FDTL rezolve problema sériu ida, maski ha’u hatene problema ne’e krime tamba agresaun fizika hasoru veteranu,” Nunura dehan ba ANTILvia telefoni, Sexta (9/12/2016).

Durante prosesu rezolve problema ne’e, membru F-FDTL rekuñese sala tanba halo halo agresaun fizika ba nia Nunura.

“Membru Militar ne’e sei iha tensaun alta. Bainhira iha tensaun alta maka sei komete nafatin irregulariedades disiplina militar nian,” Nunura dehan.

Ho problema ne’e, Nunura ema Veteranu, lori Veteranu sira hotu nia naran rekomenda ba F-FDTL, atu militar sira presiza  respeita veteran.

“Imi militar mai husi ami FALINTIL, tamba ne’e tenki Respeita ema Veteranos hanesan imi nia Aman, imi nia Maun boot hanesan imi an rasik. Fardas sira ne’ebe imi hatais, mai husi ami e Fardas sira ne’e iha imi-nia loron fase ho Rinso no be’e. Maibé, iha ami-nia tempu fase ho Ran, Mataben no Kosarben. Nune’e, fardas sira ne’e ba ami Veteranu sira Sagradu tebes,” Nunura dehan.

Nia mós husu atu membru  F-FDTL sira respeita mós povi Timor-Leste husi labarik to’o ferik katuas. Husu ba instituisaun defeza hatudu professiolizmu no komportamentu di’ak atu sai Forsa ida kredivel iha Timor – Leste.

“Ita labele sai hanesan Forsas TNI iha tempo uluk. Imi so atua tuir ordem komando Militar nian e labele tuir ida idak nia hakarak, Dixiplina Militar maka imi-nia matadalan,” Nunura dehan.

Alemde ne’e, Nunura husu instituisaun F-FDTL atu hametin tan edukasaun sivika ba mmebru F-FDTL sira, liliu oinsá kona-ba rekonesimentu ba veteranu sira ne’ebe uluk luta ba libertasaun rai ida ne’e.  (Jornalista: Gantry Meilana / Editor: Otelio Ote

Foto: Veteranu Nunura (no 3 tu'ur iha oin) wainhira rezolve nia problema hamutuk ho veteranu balun no komando F-FDTL ba agresaun fiziku ne'ebe membru F-FDTL halo ba nia iha Metinaru, 6 Dezembru 2016. Fotografia: Dok. Nunura