sábado, 28 de janeiro de 2017

ABILIO ARAUJO PRIENSE KRITERIU SOSA ASAUN TT, NILTON HO ALFARO FO PARABENS

Emprezariu Timor oan Abilio Araujo hetan ona indikasaun  husi ezekutivu kompanha OI para sosa asaun 54,1% iha Timor Telecom (TT).

Antes ne’e, iha emprezariu lubuk ida nasional ho internasional maka hatama proposta hodi kompete sosa asaun OI nian iha Timor Telecom, maibe Abilio Araujo ho nia grupu ne’ebe maka nia ofisiu iha Dubai, maka prinese kriteriu hodi sai the best one atu sosa asaun TT nian ho baindeira Investel Comuniacation.

Investel Comunication aprezenta nia presu ho valor milhoens 72.5 USD, ne’ebe posivel hetan oportunidade legal atu sosa asaun OI nian.

Antes ne’e, kompanhia  Esperansa Timor Oan Group (ETO) ne’ebe nain maka Nilton Gusmão, mos aprezenta ninia proposta    atu sosa asaun OI nian iha TT, maibe ninia presu la konvense OI no ikus mai ezekutivu OI aseita ho proposta Abilio Araujo nian ne’ebe aprezenta husi ninia kompanhia Investel Comunication.

Timor Telecom nia estrutura  asionista ka sosio, kompostu husi Telecomunicasão Publiku de Timor (TPT), ne’ebe nia komposizaun mak hanesan PT Partisipasões SGPS, S.A. (41.12%), Diocese Baucau ho Fundasaun São Jose (9.67%), Fundasaun Oriente (3,22%), ne’ebe konstitui sai naran TPT  ho nia asaun 54,1%, Estadu Timor Leste (20,59%), kompanha VDP Operator Holdings (Maneul dos Santos) husi Macau (17, 86%),  Julio Alfaro (4,48%), ho PT Partisipasaun SGPF, SA, (3,05%).

Wainhira mosu krizi boot kompanhia OI nia laran tanba dividas barak, maka OI deside fa’an nia asaun maioria iha TT  hodi loke kokursu publiku internasionalmente ho nia razaun bele hetan empreza ne’ebe aprezenta valor diak liu para bele selu OI nia tusan  no bele devolve OI nia investimentu iha TT nia laran.


Ho nune’e, proposta Abilio Araujo ho nia grupu ne’ebe mai ho kompanha Investel Comunication ho valor milhoens 72.5 USD bele asegura no satifas OI nia interese.

“Hau nia kompanha Ivestel Comunication ho sede iha Dubai, ami halo ami nia proposal, tuir hau nia hatene iha kompanha barak mak hato’o proposta, maibe iha selesaun Kompanhia Investel Communication mak diak liu (the best one) ba OI, tanba OI nia hakarak fa’an la’os haree ba deit presu deit, maibe mos hare katak osan iha ka lae,” hateten Abilio Araujo, hodi responde JNDiario iha nia residensia iha Tibar, Bazartete, Liquica, Kuarta (25/01/2017).

Abilio Araujo hateten, ezekutivu OI hakarak ona Investel Comunication sosa ninia asaun iha TT, tanba Investel Comunication aprezenta proposta ho kualidade no aprezenta ninia akuntabilidade ho dokumentus konfidensiais sira ne’ebe garantidu sosa asaun OI nia ho cash.

Iha kompanha Invetel Comunication, Abilio Araujo kontrola sosio 50% no kompanhia rua seluk, ida husi China no ida seluk husi Arabia mos iha 50%.

“Hau bele dehan katak kompanha Investel Comunication  hau mak prezidente no xefi ezekutivo, hau dehan katak na’in mak Timor oan, katak Timor oan iha rai liur no Timor oan iha rai laran,” hateten Abilio Araujo.

Dokumentus hotu ne’ebe liga ba negosiasaun sosa asaun OI nian ne’e kompletu ona, inklui osan iha bankaria mos prontu ona no Bord of Director husi OI mos aprova hotu ona, hein deit banku atu asina no hetan legalizasaun husi Tribunal Brazil nian.

OI iha krize boot ida, katak iha tusan deit hamutuk Bilhoens 32 USD, kompara ho fundu petroliferu Timor nian  dala rua, ho tusan ne’e bele dehan OI bankerota, maibe sira nia asset mos boot tebes, tanba ne’e maka sira hakarak fa’an sira nia asset hotu hanesan iha TT, São Tome Telecom, Cabo Verde Telecom, no Angola Telecom. Maibe, Estado Brazileiro lakohi OI atu bankarota, tanba OI hanesan kompanha ne’ebe mak foti Estado Brazil nian naran ne’e maka deside katak agora ne’e  Tribunal maka hola konta hotu kona-ba osan tama sai iha kompanha OI.  Atu dehan deit katak,  OI iha prosesu ida naran zudicil recovery katak, osan sira atu tama ba ne’e la’os OI mak kaer mais Tribunal maka kaer.

“Desizaun ba sosa asaun TT hein deit desizaun husi Tribunal Brazil nian, husi Timor hau koalia ona ho Estado hanesan Primeiru Ministru (PM), Rui Maria de Araujo, Ministro Obras Publikus, Transportes no Komunikasoens (MOPTK), Gastão de Sousa sira hot-hotu apoia, tanba Timor oan ida mak hakarak sosa, tanba Estado lakohi sosa entaun nain ne’e bele fa’an fali ba ema seluk, do que ema rai seluk mak sosa diak liu Timor oan mak sosa rasik,” hateten Abilio Araujo.

Prezidenti Grupo SACOM ne’e aprofunda katak,  Investel Comunication ninia proporta hetan the best one la’os tanba iha ema Timor oan, maibe tanba Investel iha osan no kondisoens pagamentus diak liu, kompara ho kompanha internasional sira seluk ne’ebe kompete mos, hanesan husi Fiji, China no rai seluk tan.

“Ba hau hakarak TT sai kompanha ida referensia, tenke iha manageman diak, tenke moderniza, no prontu atu halo tan investimentu atu nia net work bele to’o iha area rurais, la’os foin liu deit Metinaro nia rede laiha ona. Ne’ebe hau koalia ona ho sosio sira seluk atu bele haluan tan site ba torres no mos haree ba rede internet nian,” hateten Abilio Araújo.

Abilio Araújo iha konfiansa katak TT sei mantein nafatin nia pozisaun numeru primeiru iha Timor, katak buat ida ne’ebe mak nia gosta iha TT maka Portugal Telecom iha tinan hira ne’e investe jovens Timor oan barak mak serbisu, kompara ho kompanhia iha Timor oan mos maibe menus.

Nei-neik no bei-beik, Abilio Araujo fiar katak, tempu ruma Timor oan deit maka sei kaer TT maibe tenke ho kompetensia no professional, katak tenke badinas serbisu, tanba iha mundu global ne’e tenke hatudu dedikasaun no seriedade, ida ne’e maka nia sei koalia ba Timor oan sira ne’ebe mak serbisu iha TT.

Momentu ne’e TT iha nia estrutura no organizasaun ne’ebe diak liu hot-hotu no kona ba kompetisaun, Abilio Araujo hateten, importate mak Autoridade Nasional de Comunicações (ANC) tenke ejerse papel kona ba garante konkorensia, katak la bele iha konkorensia desleal, tanba saida mak nia dehan hanesan ne’e, tanba operador tolu ne’e tenke iha akuntabilidade no tenki iha auditing husi kompanhia boot internasional, atu bele garante nia transparensia ba kustus no  rendimentu (income).

“Kuandu sai nain tiha ona ba iha TT, hau hakarak mos TT ba investe iha rai sira seluk hodi halo internasionalizasaun ba TT, tanba ne’e maka hau koalia tiha ona ho OI, katak kuandu ita rezolve tiha ida ne’e ami prontu atu sosa OI nia saham iha rai seluk,”  hateten Abilio Araujo hodi aprofunda mos katak, atu realiza ambisaun ne’e tenki iha gestaun diak, planu investimentu diak, renovasaun, no haree mos merkadu entre operador seluk.

“Kuandu kontratu ne’e asina ona husi kompanhia Investel Communication, diresaun ka funsionarios kompanhia OI nian tenke rezigna an hotu ona. Hau mos sei konvoka asembleia jeral ida ne’ebe involve sosio sira hotu, hanesan Estado, Julio Alfaro  no asionista seluk atu halo fali planu no hili fali deresaun sira,” hateten Abilio Araujo.

Tuir estatutu Investel Comunication nian katak,  iha administrador hat, Estado rua no Manuel iha ida, ne’ebe Investel mak maioria. Maibe, ba Abilio Araujo, hirak iha parte administrasaun ne’e iha responsabilidade, agora ne’e modelu oin seluk, iha tempu Portugal no OI nian administrasaun seluk, tanba OI mak maioria.

Iha tempu OI nian OI mak hili administrador delegadu ida mak halo konta buat hot-hotu, no nia mak monta fali diretor ka departamentu, maibe Abilio  lakohi asiniosta sira ne’e tenke iha diretur ezekutivo, maibe depende.

Abilio Araujo la iha duvidas atu salva Timor oan sira ne’ebe mak agora dadauk serbisu iha kompanhia TT, tanba nia iha prinsipiu katak tenke salva Timor oan husi saida deit.

Husi sorin seluk, Nilton Gusmão nudar hnain ba ETO Group ne’ebe compete mos ho Abilio Araujo iha proposta ba sosa asaun OI nian iha TT fo parabens ba Abrilio Araujo ho nia grupu mak hetan indkasaun ona husi ezekutivu OI nudar vensedor ba sosa asaun OI nian.

“Hau apresia tebes ho Dr. Abilio Araujo no hato’o parabens ba Dr. Abilio ho nia grupu. Tanba hakarak ka lakohi, ita Timor oan hotu tenki orgulhu tanba iha Timor oan ida mak sai duni vensedor ba kompeteisaun negosiu internasional,  ne’e hatudu katak, Timor oan mos bele no Timor oan mos iha kbi’it,” hateten Nilton Gusmão bainhira dada lia ho JNDiario via telefone.

Husi sorin seluk, eis Prezidenti Camara Comercio no Industria Timor Leste (CCI-TL) nudar mos asionista TT, Julio Alfaro aprofunda katak, inteserse boot ne’ebe nia iha maka asaun OI nian ne’e tenki monu ba Timor oan ida nia liman.

“Desizaun OI nian ne’e mai hili Dr. Abilio Araujo ou  Nilton Gusmão, hau apresia tebes ba sira nain rua hotu, tanba ba hau importante asaun OI nian iha TT ne’e tenki Timor oan maka manan no tenki Timor oan maka kontrola,” afirma Julio Alfaro via telefone.

Julio Alfaro sublinha katak, area telekomunikasaun ne’e importante ba nasaun ida no ba Timor nia situasaun, diak liu telekomunikasaun ne’e tenki iha Timor oan nia liman atu bele asegura no garante segredu nasaun nian. mia

Jornal Nacional

2 comentários:

Julio Lino Tilman disse...

Parabens ba Dr. Abilio Araujo ho Nia Grupu Investel Telecomunication
Ba manan ona TT
Viva Timor-Leste
Timor oan mak salva malu

Lifer Farm disse...

parabens ba Abilio Araujo ho nia grupu mak hetan indkasaun ona husi ezekutivu OI nudar vensedor ba sosa asaun OI nian.
Viva Timor-Leste
Viva Dr.Abilio Araujo