KOMANDO PNTL HASAI ALERTA, KONTRA REGRA KAMPANHA SEI KAPTURA

Komando Geral Polisia Nasional Timor Leste (PNTL) alerta ba apoiantes no militantes kandidatus prezidenti hotu nian atu la’o tuir regras kampanha presidensial nian, maibe se kontra regras kampanha nian, maka PNTL sei foti medidas halo kapturasaun.

Komandante Jeral PNTL, Julio da Costa Hornay, afirma katak, iha kampanha eleisaun nian ema hotu-hotu tenke respeita ema seluk ninia direitu, liu-liu ba regras tranzitu nian, tanba  sé mak viola tenke lori ba prosesu.

“Klaru regras tranzitu nian ema hotu tenke kumpri, tantu uja kareta, motor uja kapasete no maksimu ema nain rua mak sae, sei viola kaptura lori ba prosesu,” afirma Komandante, Julio Hornay ba Jornalista sira iha Palacio Prezidenti Republika, Kinta (26/01/2017), hafoin informa kestaun seguransa iha teritoriu Timor laran, ba PR Taur Matan Ruak.

Eleisaun presidensial sei halao iha loron 20 fulan Marsu, antes loron eleisaun, kandidatu sira sei halo kampanha durante semana rua.

Komando PNTL sei kopera ho STAE no CNE para iha kalendariu kampanha nian hodi bele intende malu, para ta’u regras, ema hotu-hotu bele respeita.

Julio Hornay sublina liutan katak preparasaun husi komando nian, preparadu husi kampanha eleisaun to’o ba loron eleisaun nian.

“Seguransa ba eleisaun, PNTL preparadu tantu ba eleisaun prezidensial to’o eleisaun parlamentar,” Julio  Hornay  hatutan.

Nia esklarese katak, la’os deit preparadu deit membrus polisia ne’ebe mak atu koloka ka destaka iha sentru votasaun sira maibe, halo mos kompras ekipamentus ba seguransa eleisaun nian.

Konaba seguransa iha Fronteira iha tempu eleisaun, Julio Hornay informa polisia husi Unidade Fronterira (UPF) ho Unidade Polisia Maritima (UPM) servisu hamutuk ho F-FDTL hodi fo seguransa iha area fronteira nian. eus

Jornal Nacional