sábado, 28 de janeiro de 2017

GOVERNU APREZENTA DEZEÑU KONSTRUSAUN PORTU TIBAR, XANANA: PORTU NE’E MODERNU

Ministériu Finansas (MF), Ministériu Obras Públikas (MOP) no Ministériu Planeamentu no Investimentu Estratéjiku (MPIE), Kinta (26/1/17) realiza  enkontru ida  iha salaun MF hodi aprezenta dezeñu konstrusaun Portu Tibar ne’ebé sei hahú iha fulan Outubru, tinan  ne’e.

Tuir MPIE, Kay Rala Xanana Gusmão, katak, Portu Tibar ne’e hanesan Projetu ida parseria Públiku no Privada. Katak, Governu no kompañia  hala’o parseria ida atu jere Portu Tibar ne’e to’o tinan 30.

“Ohin (Horiseik-red) ami hasoru malu ne’e, hodi haree ba komite ida hanesan ita temi, steering committe ida atu tau matan ba iha ne’eba. Komite ne’e mak kompostu husi MOP, MF, no MPIE mak iha unidade ida tau matan ba operasoens ba kontrusaun ne’e. Entaun liu husi enkontru ida ne’e atu entrega servisu ba ekipa sira para jere konstrusaun Tibar,”dehan Xanana Gusmão ba Jornalista sira iha salaun enkontru MF-Dili.

Xanana Gusmão esplika, iha ekipa rua mak atu jere prosesu ba konstrusaun Portu Tibar refere.

“Iha ekipa rua mak atu jere prosesu konstrusaun ne’e. Ami aprova sira-nia funsionamentu halo nusa? Sira halo saida? Ministeriu tolu ne’ebé tau matan ba iha ne’eba halo saida? Iha sa oras? Sa tempu? Buat sira ne’e hotu  mak ami halo tiha ona no ami entrega ona knaar ba sira para sira atu prepara. Sei iha problemas ba sira seidauk iha fatin, mas husu MOP haree ona fatin atu fo ba sira fo kondisoens no fo servisu ba sira,”dehan Xanana.


Xanana Gusmão, haktuir, razaun Governu harii Portu Tibar, tanba fatin Portu Dili nia kondisoens la sufisienti.

“Ita bo’ot sira mos hatene ona kona ba Portu Tibar, ita bo’ot sira mos haree ona ita-nia Portu agora ne’e kontentores sira susar atu mate, Nakroma mos kuandu atu mai, Oecusse oan sira mos nakonu iha estrada, buat sira ne’e hotu. Tanba ida ne’e mak hanoin katak problemas karegamentu ho problemas oi-oin deit. Ró sira ikus ne’e ladun tama ekonomia tun oituan, dala ruma Ró iha tasi laran  para barak  hanesan fali sidade iha tasi laran. Ne’e hotu mak Governu halo desizaun ba halo Portu Tibar ida ne’ebé boot, diak no modernu,”hatutan Xanana Gusmão.

Maibe Xanana Gusmão  salienta, nia parte hatene atividades iha Portuarias karegamentus atividade ida difisil oituan, ne’e duni trainamentu ba Timor oan, diak liu treinu ho kompañia sira ne’ebé preparadu hodi organiza didiak.

Portu Tibar ne’e sei hahú konstrusaun iha fulan Outubru 2017 no sei remata iha 2020. Orsamentu ba konstrusaun Portu Tibar ne’e ho persentajen 40%.Car

Jornal Nacional

Sem comentários: