Jerasaun Foun Tenke Promove-An Iha Politik

DILI - Oras nee kandidatura ba Prezidente Republika (PR) tinan 2017 too 2022 nain 6 mak deklara-an ona ba publika.

Husi nain 6 nee, nain 4 jerasaun foun hanesan, Jose Neves (Samalarua), Antonio Fatuk Mutin, Flavio Pereira no Amorim Vieira. Nain 2 seluk jerasaun tuan mak Francisco Guterres Lu-Olo no Jose Luis Guterres.

Tuir Vice Prezidente Partidu Libertasaun Popular (PLP), Andre da Costa L4 katak, jerasaun tuan no jerasaun foun mak sei kompete malu iha eleisaun prezidensial nee hatudu katak jerasaun foun komesa promove-an iha politika.

Ami hakarak jerasaun tuan, maibe povu agora nee lae sira hakarak jerasaun foun, nee ita agradese tanba nee jerasaun foun tenke promove-an iha politika,” dehan Vice Prezidente PLP, Andre da Costa L4 ba jornalista sira iha nia knar fatin, Mascarinhas-Dili, Sesta (27/01/2017).

Vice Prezidente PLP haktuir, jerasaun rua nee nee, ida neebe mak ukun iha tinan 2017 ba 2022 nee povu mak sei deside iha eleisaun, tanba nee jerasaun foun mak manan iha eleisaun Prezidensial jerasaun tuan prontu atu kopera.

L4 sublina, kualker se deit mak hakarak sai lideransa tenke promove-an, tan nee jerasaun foun tenke promove dadauk ninia-an ona, laos ema seluk mak promove, maibe nain rasik mak promove-an.

Iha sorin seluk, Observador Politika-UNDIL, Hugo Lorenço dehan, kandidatura jerasaun tuan ka jerasaun foun ba pozisaun Prezidente Republika (PR) tinan 2017 too 2022, mak sei kompete iha eleisaun prezidensial. Informasaun kompletu iha STL Jornal no STL Web, edisaun Sabado (28/1/2017). Raimundo Sarmento Fraga

Suara Timor Lorosae