sábado, 18 de fevereiro de 2017

Governu timoroan sei investiga ró xinés sira ne'ebé halo peska ba tubaraun hamutuk tonelada 40

Iha loron-sesta ne'e, Governu timoroan fó sai ona katak sei halo "investigasaun kompletu ida" ba ró xinés sira ne'ebé iha fulan hirak ikus ne'e halo peska ba tubaraun tonelada 40 resin iha tasi sira Timor-Leste nian no avalia medida sira kastigu nian.

"Governu sei tuir prosedimentu sira, hodi avalia katak titular sira hosi lisensa sira (peska nian) halo atuasan loloos, hodi garanti ekilíbriu hosi sira nia direitu no responsabilidade sira ho respeitu ba lei sira Timor-Leste nian", explika hosi ministru Estadu no porta-vós Governu nian, Agio Pereira, liuhosi komunikadu.

Komunikadu mosu liutiha oras 24 hafoin Ajénsia Lusa fó sai iha notísia katak ró xinés hamutuk 15 ne'ebé halo operasaun ho lisensa iha Timor-Leste halo ona peska ba tubaraun hamutuk tonelada 40.

Imajen sira hosi vídeo ne'ebé halo iha loron 10 Fevereiru, no ne'ebé maka Lusa hetan asesu, hatudu ró-tiha xinés sira iha besik tasi-ibun Timor-Leste nian iha parte norte, ho ró-tiha haat besik ba ró-inan, ho dimensaun boot, hodi depozita animal sira ne'ebé sira peska.

Autor sira hosi imajen sira lakohi fó sai identidade.

Imajen sira hatudu depózitu ida nia laran hosi ró prinsipal ne'ebé bele haree de'it ikan tubaraun, hamosu preokupasaun maka'as entre organizasaun ambientalista sira kona-ba ró sira ne'e halo peska ba animal sira ne'ebé hetan protesaun hosi lei timoroan nian.

Ró sira ne'e pertense ba empreza Pingtan Marine Entreprise, ne'ebé nia atividade iha tasi sira Timor-Leste nian mosu hafoin Ministériu Asuntu Marítimu no Peska indonéziu nian suspende tiha konsesaun ka renovasaun ba lisensa sira peska nian iha tinan 2014.

Iha komunikadu ne'ebé fó sai iha loron-sesta kalan, oras lokal iha Díli, ezekutivu timoroan konfirma informasaun sira ne'ebé avansa hosi Lusa, hodi refere katak entre loron sira 9 no 12 Fevereiru ikus ne'e, Diresaun Nasional ba Inspesaun hosi Peska halo ona inspesaun rotina ida ba ró hamutuk 15 iha Portu Caravela, iha Baucau.

"Inspesaun ne'e detekta ona katak ró sira lori tubaraun besik tonelada 43, ne'ebé bele viola lei Timor-Leste nian no viola lisensa hosi peska ne'ebé sira iha", refere hosi ezekutivu.

"Hanesan konsekuénsia, Governu, liuhosi Ministériu Agrikultura no Peska, tuir hela prosedimentu sira ne'ebé tenki halo bainhira inspesaun ida hetan potensial violasaun ba lei ka ba kondisaun sira ne'ebé estabelese", subliña.

Governu explika katak "fó importánsia boot ba rekursu tasi nian, ba sustentabilidade hosi rezerva ba kriasaun ikan sira nian no ba prezervasaun hosi animal protejidu sira" no "rekoñese importánsia hodi respeita konteúdu sira hosi akordu sira peska nian, hanesan aspetu importante no pozitivu ida hosi dezenvolvimentu no diversifikasaun ekonómiku nasional".

Ró hamutuk 15 iha lisensa hodi peska iha tasi timoroan nian "ho kondisaun espesífiku sira no iha limiti sira hosi lejislasaun timoroan nian" iha validade to'o loron 15 Novembru 2017.

"Investigasaun kompletu" halo hela hosi grupu ida serbisu nian ne'ebé inklui reprezentante sira hosi Ministériu Agrkultura no Peska, hosi Diresaun-Jeral Alfándega nian, hosi Komponente Naval F-FDTL nian, hosi Unidade Marítimu no hosi Serbisu sira Investigasaun Kriminal PNTL nian, hosi Serbisu Migrasaun hosi Ministériu Interior no hosi Gabinete Primeiru-Ministru nian.

"Ho baze hosi rezultadu sira hosi investigasaun ne'e, sei foti medida sira tuir lei sira Timor-Leste nian no tuir kondisaun sira lisensa nian", ne'ebé tuir Governu "bele hahú hosi multa to'o suspensaun ka anulasaun ba lisensa sira peska nian.

Lei ne'ebé halo iha Timor-Leste hatete katak bainhira kaer animal sira ne'ebé iha protesaun bele hetan kastigu kadeia tinan ida to'o tinan lima no multa entre dolar 500 no rihun resin.

Notísia hosi atuasaun ró xinés sira nian ne'e hamosu ona debate maka'as iha rede sosial timoroan sira nian ho komentáriu oioin no fahe informasaun sira, barak liu husu atu Governu halo investigasaun.

SAPO TL ho Lusa – VIDEO

Sem comentários: