Ministériu
Komérsiu, Indústria ho Ambiente (MCIA) Timor-Leste, iha loron-sesta ne'e, husu
ona deskulpa tanba divulgasaun hosi folletu promosaun komersial ida ne'ebé iha
sala ortográfiku barak iha textu sira, hodi afirma katak empreza responsável ba
produsaun sei asumi kustu sira.
"Ministériu
lamenta no rekoñese katak halo ona sala barak iha elaborasaun hosi folletu sira
ne'e. Ami informa katak ami rekolla tiha ona ezemplar sira ne'ebé fahe tiha
ona", refere hosi komunikadu MCIA nian ne'ebé haruka ba Lusa.
Nota
refere katak MCIA foti ona "medida sira no prosedimentu adekuadu
sira" hodi nune'e bele halo fali folletu sira ne'e "ho rigor
maka'as" no nia "folin total ba impresaun hosi katálogu foun sira sei
asumi hosi empreza ne'ebé halo tiha ona" folletu sira ne'e.
Iha semana ne'e,
Lusa fó sai ona katak tenki halo destruisaun ba pelumenus ezemplar
rihun rua hosi folletu promosaun ba produtu timoroan sira tanba iha sala barak.
Ideia
hosi folleto ho kór, ho pájina hamutuk 26, maka hakarak fó koñese potensial
hosi produtu oioin timoroan nian, hosi masin tasi nian to'o ai-teka, hosi au
to'o kafé no mina-nuu, hosi hena tradisional sira (tais) to'o foos-mean no
metan.
Maibé
textu sira iha lian inglés no lian portugés ne'ebé hatudu produtu ida-idak iha
sala barak nune'e folletu ne'e tenki hetan fali revizaun.
Folletu
sira hosi Ministériu Komérsiu, Indústria ho Ambiente (MCIA) Timor-Leste nian
haruka tiha ona ba embaixada oioin Timor-Leste nian no fahe ona iha fatin oioin
iha nasaun laran, inklui iha hotel sira.
Aníbal
Carvalho Martins, diretór hosi promosaun no marketing MCIA nian, explika ona ba
Lusa katak ezemplar hamutuk 2.000 ne'ebé iha folin dolar rihun 25 halo ona hosi
empreza gráfiku ida timoroan nian ne'ebé hetan knaar hodi prepara textu sira.
SAPO
TL ho Lusa – Foto: António Sampaio / Lusa
Sem comentários:
Enviar um comentário