sábado, 18 de março de 2017

Rezultadu preliminár observasaun ba kampaña eleitorál kandidatu prezidensiál 2017 - FONGTIL

PARTILHAR

FONGTIL - Komunikadu Imprensa

Rezultadu preliminár observasaun ba kampaña eleitorál kandidatu prezidensiál 2017

Dili, 17 Marsu 2017 – Forum ONG Timor-Leste (FONGTIL) núdar sombriña ba Organizasaun ONG Nasionál no Internasionál ne'ebé eziste iha Timor-Leste hodi hala’o-nia misaun advokasia no sai ajente kontrola sosiál liuhusi membru ONG-nia atividade sira.

FONGTIL harii ona Rede Organizasaun Naun-Governmental Timor-Leste (Rede ONG) ba eleisaun prezidensiál períodu 2017-2022 ne’ebé kompostu husi ONG nasionál no internasionál sira hodi observa lala’ok eleisaun hahú pre-eleisaun, eleisaun, no pós-eleisaun.

Rezultadu preliminár observasaun ba kampaña eleitorál kandidatu prezidensiál 2017 husi rede organizasaun naun-governmental hahú husi loron 3 Marsu to’o 17 Marsu 2017 identifika katak:

1.    Iha durante kampaña prezidensiál nian; Xefe suku husi Bucoli, Munisípiu Baucau no Xefe Suku Mehara, Munisípiu Lautem, la autoriza kandidatu sira hala’o kampaña iha suku refere. Tanba ne’e, Rede ONG husu ba órgaun eleitorál sira hanesan STAE no CNE atu halo investigasaun.

2.    Durante kampaña; labarik sira barak mak involve no uza atributu sira hanesan adezivu (sticker), bandeira, imajen, kamizola kandidatu nian. Rede ONG husu ba órgaun eleitorál sira hanesan STAE no CNE atu fó atensaun másimu para labele repete fila-fali iha kampaña eleitorál tuirmai.

3.    Kandidatu balun hala’o kampaña besik liu eskola sira ne’ebé prejudika tebes prosesu aprendizajen. Konsekuénsia, estudante sira barak mak sai no tuir kampaña ne’e. Nune’e mós, Ekipa identifika fiskais eleitorál sira mós tuir kampaña bainhira tuir hela treinamentu sira.

4.    Bainhira iha tempu komísiu (rally): apoiante sira perturba tebes orden públika hanesan taka dalan ne’ebé prejudika tebes ba viajen pasajeiru sira nian. Nune’e mós, apoiante sira komité ka kontra lei tránzitu nian hanesan hasai xapa matríkula motor ka karreta oin-kotuk, kanu-resin, la uza kapasete, no tabele karreta, no tula apoiante sira liu kapasidade karreta nian. Konsekuénsia, apoiante balun mate ne’ebé akontese iha Munisípiu Baucau. Tanba ne’e, Rede ONG husu ba órgaun eleitorál sira hanesan STAE no CNE atu fó atensaun ba polísia (PNTL) sira atu foti medida imediata hodi hadi’ak liután situasaun ne’e iha kampaña eleisaun tuirmai.

5.    Movimentu apoiante sira: Durante kampaña, partidu polítiku nebe suporta kandidatu espesífiku lori apoiante sira husi munisípiu seluk. Rezultadu, apoiante sira ataka malu no kria perturbasaun públiku. Ezemplu, kazu Rai-kotu ne’ebé estraga uma 32 inklui sasán seluk. Rede ONG husu ba órgaun eleitorál sira hanesan STAE no CNE atu fó atensaun ba kandidatu sira no karik kria regulamentu sira hodi evita mobilizasaun masa ba kampaña eleitorál tuirmai.

6.    Iha kampaña: komunidade sira tauk hodi partisipa no rona programa kandidatu sira, ho razaun, sira haree ofisial seguransa hanesan PNTL, liu-liu Batallaun Orden Públika (BOP) ne’ebé kompleta ho arma sira. Tanba ne’e, Rede ONG husu ba órgaun eleitorál sira hanesan STAE no CNE hodi fó atensaun ba PNTL hodi klarifika ba públiku ba sira-nia prezensa hodi nune’e komunidade bele komprende.

7.    Kandidatu balun komité irregularidade ba oráriu kampaña nian. Ezemplu, iha Munisípiu Bobonaro, oráriu kampaña iha Maliana muda fali ba Railaku. Rede ONG husu ba órgaun eleitorál sira hanesan STAE no CNE atu nafatin fó avizu (warning) ba kandidatu sira no karik hadi’ak iha kampaña eleitorál tuirmai. 

8.    Durante kampaña, Rede ONG identifika atributu arte marsiais sira ne’ebé uza husi apoiante sira iha fatin kampaña nian. Nune’e mós ekipa identifika apoiante uza atributu partidu seluk ne’ebé la'ós apoiante ba kandidatu refere. Ne’e bele hamosu dezintendimentu entre apoiante no naun-apoiante sira nebe bele hamosu konflitu. Tanba ne’e, Rede ONG husu ba órgaun eleitorál sira hanesan STAE no CNE atu husu kandidatu refere hodi fó esplikasaun klaru kona-ba asuntu ne’e. Nune’e mós, ida ne’e sai referénsia ida ba STAE no CNE hodi hadi’ak liután iha kampaña eleitorál tuirmai.

9.    Durante kampaña, ekipa susesu kandidatu prezidensiál nian hasai ka hala’o kampaña negra hanesan fó sai liafuan lorosa’e-loromonu. Tanba ne’e, Rede ONG husu ba órgaun eleitorál sira hanesan STAE no CNE atu fó atensaun ba ekipa susesu sira atu kuidadu linguajen sira ne’ebé bele hamosu konflitu iha futuru.

10.  Kandidatu prezidensiál balun obriga família atu vota ba kandidatu refere ne’ebé Rede ONG konsidera, sira (kandidatu) kontra tebes slogan vota livre, diretu no segredu ne’e. Rede ONG husu ba órgaun eleitorál sira hanesan STAE no CNE atu avizu ba públiku hodi hato’o keixa ba STAE, CNE ka PNTL.

11.  Apoiante sira la respeitu oráriu kampaña ne’ebé fó sai husi CNE. Ezemplu, iha Munisípiu Covalima, kandidatu prezidente balun iha oráriu atu hala’o kampaña, maibé, apoiante ne’ebé suporta ba kandidatu seluk mós halo komísiu iha fatin refere. Ne’e la respeitu ba oráriu sira ne’ebé iha, nune’e mós bele tendénsia ba konflitu sira. Rede ONG husu ba STAE no CNE atu fó nafatin avizu ba apoiante ka kandidatu sira no bele hadi’ak asuntu sira ne’e iha kampaña tuirmai.

12. Rede ONG identifika kata kandidatu balun hala’o kampaña ho kalsa badak. Rede ONG duvida ba dixiplina no konxiénsia kandidatu sira bainhira hala’o kampaña. Tanba ne’e, Rede ONG husu ba STAE no CNE hodi haree asuntu ne’e.
  
Prezensa Rede ONG hodi sai observadór ne’ebé independente no voluntariamente atu kontribui ba eleisaun prezidensiál 2017 nian ne’ebé livre no justu. Tanba ne’e, Rede ONG hakarak hato’o agradese ba ekipa ONG tomak iha munisípiu 12 inklui Rejiaun Autonomia Espesiál Oecusse-Ambeno (RAEOA) ne’ebé fó kontribui másimu ba relatóriu preliminár observasaun ne’e. Nune’e mós, Rede ONG agradese ba kandidatu nain ualu ne'ebé hala’o ona ninia kampaña eleitorál prezidensiál ne'ebé di’ak ho responsabilidade; PNTL ne’ebé asegura situasaun ho di’ak no trankuilu, no komunidade tomak ne’ebé kontribui pás no estabilidade durante periodu kampaña. Hotu.

Atu hetan informasaun liután, favór kontakta:

Forum ONG Timor-Leste (FONGTIL)

Manuel Simeoa
Koordenadór Advokasia ba Munisípiu sira
Telemovel : +670 7857 1678

Laura Pina
Xefe Ekipa Rede ONG
Telemovel : +670 7810 9069

*Rede Organizasaun Naun-Governmental Timor-Leste (Rede ONG) anúnsiu preleminár rezultadu observasaun ba kampaña prezidensiál 2017. Photo: Rede ONG
PARTILHAR

Author: verified_user

Publicação luso-timorense sem fins lucrativos

0 comentários: