sábado, 18 de março de 2017

STAE Distribui Material Elisaun Ba Munisipios no Estrangeiru

PARTILHAR
Sekretariadu Tekniku Administrasaun Eleitoral (STAE) halao ona distribuisaun material elisaun hanesan buletin de votu, lista eleitores, kabina votu ba munisipios inklui Australia no Portugal.

Diretor STAE, Acilino Manuel Branco hateten distribuisaun ba rai liur sei lori husi official diplomata sira no supervisiona husi official CNE no ba munisipios hetan segurasan husi Polisia Nasional Timor-Leste (PNTL). 

“Material sira ne’e sai ohin ba munisipios atu ita iha tempu loron hat halo verifikasaun no preparasaun tuir nesesidade sentru votasaun sira, karik iha falta ruma ita kompleta,” nia hateten.

Depois halo verifikasaun iha munisipios, nia hateten loron 19 material sira ne’e transporta ona ba iha sentru votasaun ida –ida atu iha loron 20 de Marsu realiza elisaun. 

Nia hateten, elisaun prezidensial periodu 2017-2022 diferente tebes ho elisaun hirak liu ba tanba tinan ne’e sidadaun Timor ne’ebe hela iha Australia no Portugal sei ezerse mos sira nia direitu.

Nia dehan, Timor oan hotu tenke orgulho ho progresu ida ne’e tanba nasaun balun maske sira hetan idenpedensia tinan barak ona maibe sira seidauk bele realiza hanesan Timor halo ne’e. 

Nia hateten, bulletin votu printi tuir numeru eleitores no iha rezerva 10% atu bele antisipa karik iha bulletin ne’ebe nakles bele troka. 

Nia informa, total eleitores hamutuk nain 747.583 husi rai laran no liur. 

Entretantu Prezidente Comisaun Nasional ba Elisaun (CNE), Alcino Barris hateten lori tempu naruk atu halo inprime ba material bulletin de votu, tanba ne’e tenke asegura to’o iha fatin destinadu ho diak. 

“Tenke asegura material sira ne’e to’o iha fatin ho diak atu labele mosu nakles, tanba se la’e bele prejudika fali kuantidade ne’ebe estabelese ona tuir akta,” nia hateten. 

Nia dehan, material sira ne’e sensitive no importante tebes, tanba ne’e husu official seguransa sira atu bele asegura didiak hodi lori susesu ba iha elisaun prezidensial tinan ne’e nian.

Entretantu Komandante Operasaun Nasional, Superintendente Xefe Henrique da Costa husu responsabilidade komando munisipio sira nian atu asegura material sira ne’e to’o iha sentru votasaun.

Maibe nia promete, katak material sira ne’e sei to’o iha fatin destinadu ho diak no sei lori fila mai nasional ho diak mos.

“Seguransa la’os PNTL nian responsabilidade deit maibe ema hotu nia kontribuisaun atu asegura seguransa iha prosesu elisaun ida ne’e,” nia hateten. 

Nia hateten, prosesu ida ne’e koko kapasidade PNTL nian hanesan agente seguransa, tanba prosesu elisaun liu ba sira hetan apoiu seguransa husi Polisia Nasoens Unidas nian.

The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: