sábado, 11 de março de 2017

WVTL no ISMAIK Asina Nota Entendimentu - Komunikadu Imprensa Konjuntu


WVTL no ISMAIK Asina Nota Entendimentu hodi Asegura Vítima sira hosi Violénsia Bazeia ba Jéneru

Aileu, 10 Marsu 2017  ̶  World Vision Timor-Leste (WVTL) ho Instituto Sekular Maun Alin Iha Kristu (ISMAIK) hosi Munisípiu Aileu asina ona Nota Entendimentu (NE) atu konstrui moru no reabilita uma-mahon ISMAIK nian hodi bele uza ba fatin akonsellamentu, refreskante no konsoladór espirituálidade, hala'o referral vítima sira ba iha instituisaun governu ne’ebé relevante no kria atividade extra sira hodi bele rekupera vítima sira-nia mentalidade ne’ebé kauza husi violénsia doméstika, abuza seksuál, violénsia seksuál no tráfiku umanu ne'ebé sei mai husi suku ualu hanesan Fatubossa, Fahiria, Fatisi, Madabeno, Seloi kraik, Seloi Malere, Liurai, no Tohumeta. 

WVTL orienta husi vizaun estratéjiku sira 2016-2019 nian mak kontinua foku ba ninia servisu atu mantein moris di’ak labarik iha Timor-Leste, ne’ebé servisu ba: Labarik sira goja saudavel, bee potável, sanitasaun melloradu, garantia labarik eduka ba vida tomak, hamenus violénsia bazeia ba jéneru no hasa’e komunidade-nia rezilensia no garantia nesesidade moris. WVTL iha projetu pilotu Redusaun Violénsia Bazeia ba Jéneru hodi bele haree asuntu jéneru nian ba norma negativa sira ne’ebé hamosu prevalénsia aas. Tanba ne’e, WVTL iha kompromisu boot atu rezolve problema sira ne’e ho governu lokál, polísia (PNTL), komunidade no relijiaun sira hanesan kanál esperansa nian ba abordajen jéneru iha Munisípiu Aileu.

Diretór País ba WVTL nian, Fabiano Valente Franz hateten "Munisípiu Aileu presiza uma-mahon ida ne’ebé seguru hodi responde vítima sira hosi violénsia oi-oin hasoru ema vulneravel sira liu-liu feto no labarik sira". 
  
WVTL mós fornese ona materiál adisionál sira hanesan mákina suku-ropa, fasilidade ba uma-mahon, desportu no fasilidade ba koziña nian.

"WVTL fornese ekipamentu hirak ne’e ho kuantidade ki'ik. Maibé, ne'e bele ajuda netik ita boot sira hodi hala’o knar di’ak liután no rekupera fila-fali fiziolojia vítima sira nian iha traumátiku nia-laran liuhosi treinamentu sira ne’ebé sei fó husi ISMAIK." Diretór País ba WVTL nian, Fabiano Valente Franz hateten.

WVTL entrega ba ISMAIK hanesan parte daruak hodi responsabiliza konstrusaun moru no reabilita uma-mahon iha resintu ISMAIK nian no sei kontinua fahe informasaun, hala’o monitorizasaun ba konstrusaun no sasán seluk ne’ebé WVTL ajuda no implementasaun obra tuir planu ne’ebé iha ona entre WVTL no ISMAIK.

Servidora Kongregasaun ISMAIK, Irma. Domingas Alzira dos Santos hateten "WVTL ajuda konstrusaun moru hanesan oferese aihan fulan-fulan ba ISMAIK."

Irma Domingas Alzira hato’o agradesimentu ba WVTL tanba resintu ISMAIK nian sei hetan seguru bainhira konstrusaun moru remata.


Reprezentante Unidade Polísia ba Ema Vulneravel sira (VPU), Jacinta dos Espirito Santo hateten PNTL sempre hetan dezafiu bainhira fó atendementu ba vítima sira tanba laiha uma-mahon ida iha Munísipiu Aileu.

“Ami sempre transfere vítima sira ba PRADET iha Dili. Maibé, ho asisténsia hosi WVTL nian ba ISMAIK hodi harii uma-mahon. PNTL sei transfere vítima sira iha uma-mahon ne’e.”

WVTL Área Jerente Aileu ba programa Violénsia Bazeia ba Jéneru servisu hamutuk ona ho ISMAIK, PNTL VPU, Feto Asaun Dezenvolvimentu Aileu (FADA), Ministériu Solidaridade Sosial (MSS), Asisténsia Legál ba Feto no Labarik (AIFELA), Mane ho Vizaun Foun (MHVF), relijiaun sira no Rede Prevensaun Rezolusaun Konflitu (RPRK) hosi Munisípiu Aileu.

NE ne’e nia validade to’o 30 Juñu 2018. Tanba ne'e, WVTL no ISMAIK sei koopera hamutuk hodi haree no rezolve problema sira ne’ebé liga ba violénsia bazeia ba jéneru. Nune’e mós koopera ho entidade tomak iha Munisípiu Aileu hodi haree hamutuk ba asuntu ne’e.

NE no projetu pilotu Redusaun Violénsia Bazeia ba Jéneru realiza tanba suporta fundus husi Programa Kooperasaun ba ONG Australianu/a (ANCP) iha ámbitu Governu Austrália ba Departamentu Australianu/a ba Relasaun Esternu no Komérsiu (DFAT).  Hotu

Atu hetan informasaun liután, favór kontakta:

Fabiano Valente Franz
Diretór País Nian
Telemovel : +670 7797 5494
Humbelino Pereira
Jerente Asosiadu ba Operasaun
Telemovel : +670 7844 6066
Jaime dos Reis
Koordenadór Senior ba Komunikasaun no Advokasia nian
Telemovel : +670 7738 0585
Email  : jaime_dosreis@wvi.org

Foto: Diretór País World Vision Timor-Leste (WVTLb nian, Fabiano Valente Franz no Servidora Kongregasaun Instituto Sekular Maun Alin Iha Kristu (ISMAIK), Irma. Domingas Alzira dos Santos asina nota entendimentu hodi harii moru no reabilita uma-mahon ne’ebé sai dahuluk iha Munisípiu Aileu. Fotográfia: Jaime dos Reis/World Vision.

Sem comentários: