Charles Schinner: Governu Timor-Leste tenki aposta iha agrikultura, bee, saúde ho edukasaun

Governu Timor-Leste tenki husik planu estratéjiku atual ne'ebé kalkula konstrusaun hosi projetu infraestrutura boot sira, hanesan aeroportu internasional sira, no aposta iha bee, agrkultura, edukasaun ho saúde, konsidera hosi investigador australianu Charles Schinner iha loron-segunda ne'e.

Espesialista australianu, hosi ONG timoroan La'o Hamutuk, ko'alia iha Asembleia Repúblika portugeza, iha Lisboa, iha debate ida ne'ebé selebra tinan 25 hosi Plataforma Internasional hosi Jurista sira ba Timor-Leste.

Iha deklarasaun sira ba ajénsia Lusa, Schinner hatete katak abut hosi problema ekonómiku Timor-Leste nian iha rezerva sira petróleu nasaun nian ne'ebé maka besik hotu ona.

"Timor-Leste besik lakon ona nia atual tempu petróleu nian. Simu ona 98% hosi osan sira ne'ebé simu hosi kampu petrolíferu sira ne'ebé maka halo daudaun produsaun", hatete hosi espesialista ne'ebé hatutan katak governu timoroan "halo di'ak" hodi "poupa parte barak hosi osan ne'e".

"Parte 2/3 hosi osan ne'e rai iha parte seluk no ne'e hanesan di'ak. Mabé tenki uza osan ne'e hodi prepara ba ekonomia ida ne'ebé maka la inklui rezerva sira petróleu nian: edukasaun hosi populasaun nian, monta sistema báziku sira ba abastesimentu bee nian, sistema nasional ida hosi saúde báziku", nia subliña.

Maibé, Charles Schinner fó hanoin, governu timoroan hala'o diferente: "Sira harii daudaun aeroportu internasional tolu tanba iha vizaun katak turista sira no empreza petrolíferu sira sei hahú semo ba Timor-Leste. La'ós ida ne'e maka povu presiza, ema timoroan barak maka nunka sei halo viajen ho aviaun iha sira nia moris".

Liu 60% hosi populasaun timoroan, Schinner hatutan, "moris hosi agrikultura, bo barak liu la'ós produtivu liu".

"Barak liu hanesan agrikultura subsisténsia, hodi fó han de'it família, no ne'e bele hadi'a, produtividade bele aumenta. Harii merkadu lokal ida ba produtu agríkola sira no aumenta exportasaun balun", nia hatutan.

Investigador fó hanoin katak Timor-Leste importa sasán sira ho folin dolar millaun 500 tinan-tinan no exporta de'it millaun 20, liu 90% hosi sasán sira ne'e maka iha kafé.

"Exportasaun kafé nian bele aumenta, maibé dalan hodi hadi'a défise komersial maka serbisu iha númeru boot no la'ós ki'ik, ka hamenus importasaun sira. No buat barak ne'ebé importadu bele iha produsaun iha lokal", nia hatete.

Maibé, nia hatutan katak governu timoroan harii daudaun portu foun ida ba ró kontentor sira, hodi prosesa ho di'ak importasaun sira.

"Ne'e halo sai susar liu dezenvolvimentu hosi fabrikante lokal sira ne'ebé labele kompete ho buat baratu sira ne'ebé to'o hosi fatin industrializadu sira hanesan Xina ho Indonézia", nia refere.

Charles Schinner uza ona bee botir ida hodi fó ezemplu kona-ba prioridade sira hosi governu timoroan ne'ebé maka nia konsidera hanesan la loos.

"Iha eventu ida timoroan nian iha bee botir oioin iha meza leten, maibé la'ós halo iha Portugal - hanesan ida ne'e - maibé halo iha Indonézia. Bainhira ita depende hosi importasaun ba bee-moos, tansá maka ita labele dedika tempu balun hodi dezenvolve sistema ida prosesamentu nian hosi bee-moos ba populasaun? No ne'e ho ema sira ne'ebé iha osan bele selu ba bee botir ida, entaun ne'e hanesan la loos", nia hakotu.

SAPO TL ho Lusa