sábado, 13 de maio de 2017

PM Kamboja ameasa ho funu sivil bainhira lakon eleisaun iha tinan oinmai

PARTILHAR
Primeiru-ministru kambojanu, Hun Sen, ameasa ona ho funu sivil ida iha nasaun bainhira nia Partidu Povu Kamboja (PPC) lakon poder iha eleisaun sira ne'ebé previstu ba tinan oinmai, informa hosi imprensa lokal iha loron-kinta.

"Partidu Povu Kamboja tenki manán eleisaun sira, eleisaun sira hotu (…) sei iha funu ida bainhira PPC husik kontrola nasaun", Hun Sen hatete iha loron-kuarta iha serimónia ida hosi Loron Veteranu sira nian iha illa Diamante, zona foun ida hosi dezenvolvimentu urbanístiku kapital nian, ne'ebé haktuir iha diáriu Phnom Penh Post.

Hun Sen sertifika katak sei la permiti situasaun sira ne'ebé mosu hafoin eleisaun jeral sira tinan 2013, bainhira opozisaun rekuza rezultadu ne'ebé aprova hosi Komisaun Eleitoral, blokeia ona formasaun parlamentu nian no organiza ona manifestasaun durante fulan barak nia laran.

Iha veteranu na'in 3.000 nia oin no ho uniforme militar ida, primeiru-ministru promete ona katak, bainhira repete fali protestu sira iha estrada, "Forsa Armada sira sei haketak lalais sira" no "bainhira hahú funu ida, entaun sei hahú".

Kamboja hala'o eleisaun lokal sira iha loron 04 Juñu tinan ne'e no eleisaun jeral iha loron 28 Jullu 2018.

Hun Sen, tinan 63, okupa kargu nu'udar primeiru-ministru hahú hosi tinan 1985.

SAPO TL ho Lusa | Foto@ Rolex Dela Pena / EPA
PARTILHAR

Author: verified_user

Publicação luso-timorense sem fins lucrativos

0 comentários: