domingo, 25 de junho de 2017

Estudantes 340 La tuir Ezame Tanba Profesor Sira Greve

Estudantes husi Ensino Sekundario Publiku Bogoro no Maubara, munisipio Liquisa nain 340 la tuir ezame primeiru semester tanba profesores voluntario halo asaun greve hodi husu rekonesementu ba Minsiterio Edukasaun.

Membru Parlamentu (MP) Angelica da Costa hato’o kestaun ne’e iha sesaun plenaria hodi husu intervensaun husi Ministerio Edukasaun atu estudante sira labele sai vitima ba problema ida ne’e.
“Ita hatene katak agora iha ezame ba primeiru trimestral ba alunus sira iha eskola hotu, maibe iha eskola rua ne’e la realiza ezame, tan deit sira nia profesores greve,” nia levanta iha plenaria,iha Parlamentu Nasional. 

Nia dehan, eskola refere iha profesores nain 30 kompostu husi permanente nain 9 no voluntario nain 21e ba profesores voluntario durante ne’e inan-aman estudantes mak selu liu husi kaixa eskolar $4 kada oras.

Desde eskola harii iha tinan 2014, profesores voluntario sira ne’e hatama ona dokumentus ba iha Ministerio Edukuasaun atu konsidera no servisu permanente ba sira hanesan profesores, maibe to’o agora seidauk. 

Iha parte seluk, Sekretario Nasional Timor –Leste Coalition for Education (TLCE), Jose de Jesus konsidera asaun greve ne’ebe profesores halo ladun diak tanba ne’e problema entre sira ho Ministerio Edukasuan, la’os ho estudantes.

“Asaun ne’ebe ladun hatudu vontade no komitmentu diak atu kontribui ba dezenvolve edukasaun iha Timor –Leste,” nia hateten.

Nia dehan, asaun ne’e impaktu bo’ot tebes ba estudantes tanba iha sira nia kaderneta ezame primeiru trimester sei mamuk. 

Nia enkoraja, mos profesores voluntario sira atu levanta kazu ne’e ba iha Ministerio Edukasaun hodi labele impaktu fali ba iha prosesu aprendizajen. 

Iha tinan kotuk, ministerio deklara laiha ona profesores voluntario maibe realidade nafatin eziste tanba ne’e husu ministerio atu halo analiza ida klean kona ba nesesidade eskola sira nian liu –liu profesores. 

“Realidade ne’ebe akontese husi uluk to’o agora profesores ida hanorin estudante nain 30-60 sala ida, ne’e ita labele garantia nia kualidade ba estudantes sira,” nia dehan.

Nia hatutan, standar normal ba prosesu aprendizajen ne’ebe efetivu mak kada sala estudantes nain 25 atu fasilita profesores halo akompanhamentu ne’ebe diak ba labarik sira.

Paulina Quintão | The Dili Weekly

Sem comentários: