Vota ba CNRT “Manán” Dezenvolvimentu

KOVALIMA, (TATOLI) - Prezidente Partidu Congresso Nacional de Reconstrução de Timor-Leste (CNRT), Kay Rala Xanana Gusmão iha kampaña dahuluk loron 20 Juñu 2017 hatete, vota ba CNRT sei garante estabilidade no dalan ba dezenvolvimentu.

“Agora ukun-an estratéjia atu manán dezenvolvimentu. Loos duni CNRT nia ukun seidauk halo buat hotu-hotu. Ita sai tiha husi krize, povu tomak hakilar adeus konflitu, welcome dezenvolvimentu ida ne’e mak ita-nian agora bá oin,” Xanana realsa iha Kampu Ladi, Suai-Kovalima, horisehik.

Ba militante liu rihun resin ho hatais faru matak nu’udar símbólu Partidu CNRT, Xanana dehan nia hamriik iha joven sira-nia oin atu lori no tulun futuru nasaun sira-nian ne’e bá oin.

“Joven sira, imi komesa hanoin bainhira mak osan tama, tinan lima mai ne’e CNRT manán, manán ne’e ho imi-nia votu no tinan lima mai ne’e ba dezenvolvimentu onaM,” Xanana husu.

Nia kontinua sadik veteranu sira labele hare  ba jogu oioin, maibe hanoin  oinsá, atu husu osan hodi loke banku kreditu, atu nune’e ba sira-nia oan no beioan sira, tanba ne’e  tinan 5 mai ne’e halo dezenvolvimentu. Nune’e hamutuk hodi hanoin oinsá atu partisipa iha dezenvolvimentu.

Lao-Mesak nu’udar  veteranu hatete, Suai sei sai nabilan liután “Ne’ebé ita labele hili sala, tanba sá mak Setembru Negro mosu, tanba Maun Xanana. Ne’ebé fó apoiu nafatin Maun Boot Xanana atu lori nafatin tinan 5 ne’e, tenke hili númeru 7. Liuliu veteranu sira iha Kovaliman labele haluha Maun Boot Xanana.”

Veteranu kompañeru, Osório Masusoko hatutan, veteranu 65 fó apoiu ba Maun boot Xanana seidauk to’o, husu povu Kovalima tomak liuliu veteranu husi tasi feto no tasi mane labele haluha, hotu-hotu vota ba maun Xanana, povu Kovalima tenke unidade maka’as.

Iha fatin hanesan Rui Lopes fó parabéns ba Xanana tanba iha ona dezenvolvimentu ba Suai, parabéns mos ba luta mina mai Timór, hodi loke kampu traballu ba Suai oan sira.

“Maun boot nia susesu boot iha Timór laran tomak, ne’ebé joven sira bele asesu internét atu hodi hatene, husu ba povu sira labele fiar ne’ebé ita laharee, maibe fiar no sente buat ne’ebé ita haree. Ha’u sei lahaluha CNRT no ha’u sei tuu ba partidu CNRT. Kuandu maun boot kaer Governu husu atu loke universidade boot iha Suai, atu Suai oan sira bele matenek liután, no keta haluha númeru 7 iha loron 22 Jullu,” Rui Lopes konvida povu Suai.

Iha kampaña ne’e mós CNRT simu afiliasaun husi partidu seluk hanesan partidu FRETILIN, PD, PUDD, PLP, Grupu Bua-Malus, no ASDT ema hamutuk nain 700 resin ne’ebe organiza liuhusi Ekipa Naroman  ho Ekipa Klibur Kadalak Sorumutu.

Jornalista: Maria Auxiliadora | Editor: Manuel Pinto

Foto iha TATOLI