quinta-feira, 27 de julho de 2017

CNRT Hakarak Opozisaun, FRETILIN sei Bolu Xanana

PARTILHAR

DILI: Partidu Frente Revolusionáriu Timor Leste Independente (FRETILIN) nu’udar partidu mais votadu, hatudu nafatin prontidaun hodi kaer governu. Tanba ne’e, bainhira partidu CNRT hakarak ba opozisaun, partidu FRETILIN sei ‘dada’ Xanana Gusmão hodi servisu hamutuk iha governu.

Pozisaun ne’e FRETILIN foti tanba sai ona promesa entre lider rezisténsia na’in rua ne’e nian antes no durante tempu kampaña nia laran.

Relasiona deklarasaun CNRT nian hakarak ba opozisaun bainhira la manan absoluta, Sekretáriu Jerál partidu FRETILIN, Mari Alkatiri hateten, FRETILIN sei respeita nafatin. Maibé, sei kaer mós ba kompromisu ne’ebé halo antes ona hodi bolu Xanana Gusmão iha formasaun governu.

“Biar nune’e ha'u sei bolu nafatin ha'u nia kompatriota Xanana para mai hamutuk ho FRETILIN atu lori nasaun ne’e ba oin,” dehan nia, iha Palasiu Prezidensiál Ai-Tarak Laran, horisehik. Mari hatutan, FRETILIN sei la ukun mesak, tanba kompromisu polítika partidu nian durante kampaña ne'e dehan FRETILIN manan, Xanana manan.

“Antes ne’e, atu manan ka la manan ha'u hateten ona buat ne’e. Ha'u hanoin polítika ne’e konsisténsia, ba kampaña hateten buat ida, tenke konsisténsia ho saida mak hato’o iha kampaña, se lae povu aban bainrua sei la fiar ona,” tenik nia.

Entretantu, eis-Primeiru Ministru ne’e hateten, FRETILIN lakohi ona ba opozisaun tanba tinan lima nia laran ona sai opozisaun.

Nia esplika, partidu FRETILIN seidauk ko’alia ho partidu seluk kona-ba koligasaun, maibé partidu CNRT klaru ona atu halo koligasaun.

“Xanana Prezidente partidu CNRT. Kuandu ita ko'alia ho Xanana, ita ko'alia ho CNRT. Balun dehan ha'u de’it ho Xanana, la ko'alia ho CNRT, (maibé) CNRT nia bandeira rasik tau fotografia Xanana iha ne’ebá,” tenik nia.

CNRT Seidauk Hanoin Koligasaun

Partidu Congresso Nacional Reconstrução Timor-Leste (CNRT) seidauk iha hanoin atu halo koligasaun ho partidu seluk hodi forma governu tanba sei foti pozisaun iha konferénsia nasionál, ne’ebé sei realiza loron 29 Jullu 2017.

“Desizaun ne’e mai hotu husi konferénsia rasik”, dehan Sekretáriu Jerál partidu CNRT, Francisco Kalbuadi Lay, iha Palasiu Prezidensiál, Ai-Tarak Laran, horisehik.

Soru-mutu ho Xefe Estadu la'ós ko'alia kona-ba formasaun Governu, konvida hotu-hotu hodi kria ambiente pás no konfiansa entre povu, liu-liu lider polítiku sira.

PLP Hakarak ba Opozisaun

Prezidente Partidu Libertasaun Populár (PLP), Taur Matan Ruak hateten, sira-nia pozisaun mak opozisaun, tanba partidu CNRT ho FRETIIN mak sei forma Governu.

“Ami pozisaun mak oposisi, mais ami opozisaun ida ne'ebé konstrutivu, opozisaun ida edukativu,” dehan nia, iha Palasiu Prezidensiál, Ai-Tarak Laran, horisehik.

Taur hatutan PLP kompromete-aan sai opozisaun ne'ebé mais edukadu, rasionál no konstrutivu.

Entretantu, Taur haktuir deklarasaun husi Prezidente Repúblika, Francisco Guterres ‘Lú-Olo’ katak, tenke hein rezultadu husi Tribunál Rekursu, depois partidu ne'ebé mais votadu FRETILIN no CNRT mak sei deside oinsá atu forma governu.

Independente
PARTILHAR

Author: verified_user

Publicação luso-timorense sem fins lucrativos

0 comentários: