DILI,
(TATOLI) – Primeiru Ministru, Rui Maria de Araújo agradese Prezidente
Parlamentu Nasionál (PN), Aderito Hugo da Costa iha audiénsia ikus entre órgaun
soberania rua iha mandatu VI Governu Konstitusionál.
“Ha’u
reprezenta membru governu hotu hodi apresia no agradese Prezidente Parlamentu
Nasionál kona-ba kolaborasaun institusionál durante tinan rua, maske órgaun
seberanu iha ida-idak nia kompeténsia maibé iha interdependénsia ba malu
durante mandatu VI Governu Konstitusionál”, afirma Primeiru Ministru, Rui Maria
de Araújo hafoin hasoru malu ho Prezidente PN, Aderito Hugo da Costa iha sala gabinete
Prezidente PN, ohin.
Nia
haktuir, Governu ho PN durante ne’e servisu iha kontestu koordenasaun no
kolaborasaun di’ak, tanba ne’e mandatu Governu atu tama ona rohan. Prezensa
ne’e hodi agradese ba servisu tomak hosi órgaun lejislativa liu-liu distintu
deputadu hotu ne’ebé servisu durante mandatu tinan rua ho balun.
Nia
hatutan, enkontru ne’e aproveita hodi entrega retratu VI Governu Konstitusionál
no CD Maubere Timor Múzika Rezisténsia ba Prezidente PN.
Enkuantu,
PN iha relasaun servisu ho governu di’ak tebes, maibé dala balun iha diferénsia
opiniaun ba polítika governu nian ne’ebé define maibé iha finál bele iha
diskusaun no iha entendimentu hanesan.
“Parlamentu
Nasionál iha relasaun servisu ho governu la’o di’ak tebes, maibé dala balun iha
diferénsia opiniaun ba polítika governu nian no dalabalun parlamentu la
konkorda, presiza diskusaun atu bele iha entendimentu hanesan iha prosesu
demokrátiku ne’ebé implementa ita nia rai”, hatutan tan.
Relasaun
entre órgaun soberania rua di’ak tebes signifika hatudu instituisaun Estadu
hahú maduru iha kontestu konstrusaun Estadu no Nasaun.
Prezidente
PN, Aderito Hugo da Costa dehan, Xefe Governu reprezenta membru governu sira
hodi fó agradesimentu entre servisu hosi governu no parlamentu relativa ho
polítika Estadu ne’ebé refleta lei no orsamentu governu ne’ebé aprezenta ba
órgaun lejislativa.
Sorin
seluk, Prezidente PN agradese kolaborasaun ho governu no ofisialmente
entrega plaka PN no mós Planu Estratéjiku PN 2017 to’o 2022 ba Primeiru
Ministru.
Jornalista:
Zezito Silva | Editora: Rita Almeida
Foto:
Primeiru Ministru ho Prezidente Parlamentu Nasionál bainhira hasoru malu iha
ámbite hato'o agradesementu durante servisu hamutuk. Foto GPM
Sem comentários:
Enviar um comentário