terça-feira, 15 de agosto de 2017

Deskansa ho Dame Aquilino-Daniel-Ruth Klaasje

DILI, (TATOLI) - Governu Timor-Leste hato’o sentidu kondolénsia ba matebian Aquilino Santos Caeiro, Daniel J.Groshong e Ruth Klaasje tanba asidente trájiku ida iha estrada, iha Munisípiu Manatutu, iha sábadu liubá.

Portavós governu, Ministru Estadu Agio Pereira, deklara katak sira na’in hirak ne’e ida-idak fó ona sira-nia kontributu ba Timor-Leste ho kbiit tomak no laran di’ak.

“Momentu lakon nian ida-ne’e, ami hato’o ami-nia solidariedade ba sira-nia família, belun no kolega sira, no fó ami-nia omenajen ba sira-nia servisu, ne’ebé sei tutan  nafatin ba jerasaun sira oinmai,” Ministru Estadu Agio Pereira hato’o ba família enlutada, haktuir komunikadu governu.

Ho laran triste tebes maka governu simu notísia kona-ba Aquilino Santos Caeiro, Daniel J.Groshong no Ruth Klaasje ninia mate.

“Lori Governu nia naran, Primeiru-Ministru, Rui Maria de Araújo, hato’o sentida kondolénsias ba família, belun no kolega sira, iha momentu lakon boot ida-ne’e nian,” nia hato’o tan.

Aquilino Santos Caeiro, Daniel J.Groshong no Ruth Klaasje serbisu ho dedikasaun, domin no haka’as sira nia an tomak, hodi husik hela kontributu importante ida ba Timor-Leste.

Timoroan Aquilino Santos Caeiro, bainhira sei moris, hala’o kna’ar hanesan Diretór-Jerál Ministériu Turizmu, Arte no Kultura nian.

Daniel J.Groshong, mai husi Oregon, EUA, nu’udar jornalista veteranu ida, fotógrafu profisionál no fundadór Fundasaun Hummingfish. Ruth Klaasje, mai husi Olanda, nu’udar hakerek na’in, espesializada iha edukasaun.

Entretantu, sentidu kondolénsias ida ne’e, governu Timor-Leste mós publika ona iha portál ofisiál governu nian ho lian ofisiál no traballu nian.

Jornalista: Rafy Belo | Editór: Manuel Pinto

Sem comentários: