Hahu fulan Janeiru
to’o Julhu 2017, Ospital Nasional Guido Valadares (HNGV) konsege rekolha $190
mil hodi hatama ba kofre estadu.
Diretor HNGV, Jose
Antonio Guterres hateten hanesan instituisaun autonomia estadu iha obrigasaun
atu kontribui reseita ba iha estado, maske oituan.
“Reseita sira ne’e ami hetan husi kama privado (VIP), medical chek up ba sira
ne’ebe atu sai forsa, polisia no ba joven sira ne’ebe ba servisu iha Korea
inklui estrangeirus ne’ebe baixa iha HNGV,” nia hateten iha knar fatin Bidau, Dili.
Alende ne’e, nia dehan HNGV mos fo espasu ida ba organizasaun ne’ebe fa’an oklu
atu aluga hodi kontribui mos ba reseita.
Nia hateten, HNGV sei nafatin esforsu atu hadia kondisaun intermus ekipamentus,
rekursu humanus no atendimentu atu fo atendimentu ne’ebe diak liu tan ba
komunidade.
Iha parte seluk, komunidade Leandro Isaac kontinua lamenta ho jestaun iha HNGV
ne’ebe fo tratamentu ne’ebe la dignu ba pasiente sira tanba falta aimoruk,
etika atendimentu ladiak no seluk tan.
Alende ne’e, nia mos preokupa kona ba moras aat ne’ebe da’et ona iha Timor
–Leste ne’ebe afeita ba iha jestaun administrasaun publika sira, mak hanesan
Korupsaun, Kolusaun no Nepotismu (KKN) ne’ebe buras loos iha rai laran hodi empede dezenvolvementu.
“Governu foun tenke reforsa KAK, Ministerio Publiku no tribunal, atu sira ne’e
hamutuk hodi kombate KKN hodi governu haree fali dezenvolvimentu iha setor
saude, agrikultura no edukasaun,e buat tolu ne’e importante tebes,” nia hateten.
Nia konkorda, jestor sira atu fo hadia kareta para fatin (garasi) iha HNGV,
maibe tenke fo importansia liu ba iha hadia atendimentu saude ba komunidade
sira.
Paulina Quintão |
The Dili Weekly
Sem comentários:
Enviar um comentário