Xanana : Kuadrus Polítika CNRT Sei Tuir Formasaun

DILI, (TATOLI) - Prezidente Partidu Kongresu Nasionál Rekonstruksaun Timor-Leste (CNRT) Kay Rala Xanana Gusmão, promete iha tinan oin mai kuadrus polítika CNRT nian tomak sei tuir formasaun kona-bá polítika no jestaun hodi hatene hatur intreses povu nian ba futuru.

“Ha’u sei dudu imi, partidu sei la mate, tanba ne’e kuadru partidu polítiku sira sei hetan formasaun polítika no jestaun iha tinan oin mai atu nune’e bele iha koñesimentu no hodi haboot di’ak liu tan partidu nune’e bele tau interese povu no nasaun nian iha futuru,” Prezidente Partidu CNRT, Kay Rala Xanana Gusmão promete iha enseramentu konferénsia durante loron tolu iha Sentru Konvensaun Dili, Domingu (6/8).

Kay Rala Xanan Gusmão hateten, CNRT sei la mate maibé sei hadia di’ak liu tan partidu ba futuru liu-liu jestaun kuadru partidu nian hodi bele haboot liu tan iha futuru.

Ho nune’e Xanana husu ba kuadrus polítika CNRT ne’ebé tilun sei fo’er alias diuk karik hahú agora tenki hamos atu partisipa haboot partidu CNRT basa CNRT ne’e sei la para, sei la’o nafatin, no forte nafatin.

“Ha’u prezidente atu kuidadu imi nafatin no atu hadia imi nia koñesimentu hotu tanba ne’e tenke haree partidu nia saúde di’ak liu tan atu matenek nafatin ba oin,” Xanana enkoraja tan.

Hodi fó hanoin, partidu boot la’ós tanba ema barak maibé tenke hadia liuhosi formasaun jestaun atu aumenta koñesimentu hodi tau interese povu no nasaun nian iha futuru.

Jornalista: Zezito Silva | Editór: Manuel Pinto

Foto: Presidenti Partidu CNRT Xanana Gusmao wainhira kualia ba militantes no simpatisantes sira iha kampanha Partidu CNRT nian iha area Maumeta, Municipio Liquica, Kuarta 28 Juinu 2017. Timor Leste sei halao eleisaun Parlamentar iha 22 Juilu 2017.Foto TATOLI/ANTONIO GONCALVES