PN Konfirma Ona Lei Investimentu Privadu

DILI, (TATOLI) –  Parlamentu Nasionál (PN) ohin, halo ona konfirmasaun ba Lei Investimentu Privadu ho votu a favór 44, abstensaun ida no kontra 0.

  

Prezidente PN, Adérito Hugo da Costa hatete PN sei prepara konfirmasaun tuir regra hodi haruka imediatamente ba Prezidente Repúblika iha tempu badak, nune’e bele promulga iha prazu loron ualu.

Deputadu José Luis Guterres husi bankada Frente Mudansa ne’ebé ho votu abstensaun iha nia intervensaun katak tempu atu hanoin dalan foun ba país iha partikulár polítika ekonómika ba rai ida ne’e.

“Haree esforsu di’ak mai husi Governu buat balun la’o ona maibé sente sé ita kontinua nafatin iha prosesu ida ne’e ha’u lafiar katak Nasaun ida ne’e sei hetan dezenvolvimentu ida ne’ebé ekilibradu, ne’ebé bele benefisia ba ita-nia povu, tanba ita fó fasilidade barak tebes ba setór privadu ba rai seluk. Ita lafó insentivu barak ba setór privadu nasionál nomós ba povu agrikultór, fundamentu ita-nia mandatu hanesan polítiku atu serví povu ida ne’ebé hela iha foho ne’ebá nomós iha sidade, ho hanoin ida ne’e mak ha’u abstensaun iha fatin ida ne’e tanba ita presiza haree dalan foun ba rai ida ne’e”, deklara nia iha intervensaun votu.

Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva hatete, PN konfirma tanba haree importánsia ba lei ida ne’e ba Timor-Leste liuliu haree ba diversifikasaun ekonómika ne’ebé daudaun ne’e la’o hela.

“Ita hakarak hala’o di’ak liután, ho lei ida ne’e importante para regula aspetu diversifikasaun ekonómika ninian tanba lei atuál investimentu ne’e lei ida ne’ebé ladún di’ak ona, lei obsoletu, lei ida ne’ebé la armoniza ho prátika korrente internasionál nian liuliu prátika ne’ebé hala’o iha ASEAN nomós Organizasaun Mundiál Komérsiu nian”, Estanislau hatete iha PN, ohin.

Lei foun ida ne’e konsentra konsesaun taxa, fiskál no naun fiskál liuliu ba investimentu sira ne’ebé iha área produtiva hanesan agrikultura, indústria transformasaun no turizmu.

Sobre lei investimentu privadu ne’ebé Prezidente Repúblika kestiona, Estanislau dehan nia rasik hasoru malu ona ho Prezidente no hato’o ona ba Prezidente.

“Kestaun sira ne’ebé Prezidente Repúblika kestiona ne’e iha lei nia laran, ezemplu iha lei ne’e dehan laharee ba área rurál, ne’e laloos tanba lei ida atuál ne’e fahe ba grupu A no B. B ne’e mak refere ba área rurál no B ne’e Baukau mós inklui área rurál nian tanba Baukau to’o agora ladún hetan benefísiu barak no bainhira tama hanesan ne’e bele hetan benefísiu barak ba dezenvolvimentu iha Baukau”.

Antes ne’e Dekretu Lei PN númeru 45/III-Lei Investimentu Privadu aprova ona husi PN maibé Prezidente Repúblika vetu polítiku tanba lakonkorda ho buat balun iha lei relativa ba reforma tributária nian ne’ebé seidauk ajusta di’ak ho situasaun investimentu no husu PN halo diskusau ho kle’an.

Jornalista: Maria Auxiliadora | Editora: Rita Almeida

Foto/Google.