terça-feira, 19 de setembro de 2017

Fretilin Lakon tan Figura Diak Ida

DILI - Ali Bin Hamud Alkatiri neebe fila hikas ba Aman Maromak nia kadunan santu iha loron 15 Fulan Setemburu 2017 iha Hospital Nasional Guido Valadares (HNGV) oras 11.45 Timor-Leste, laos deit lori tristeza ba familia matebian mesak. Maibe lori mos tristeza boot ba Partidu Fretilin tanba matebian mos nuudar figura Fretilin diak ida.

Tuir Deputadu David Mandati Dias Ximenes husi Bankada Fretilin katak, familia boot Fretilin mos lakon figura diak ida, tanba desde iha matebian ninia sekuensia vida da luta primeiru momentu kedas nia adere ba Fretilin.

"Hau konese nia (red Ali) kleur kuandu nia sei joga iha Akademika Ponta Eskuerda, depois nia tun mai husi ai-laran ami sei lao hamutuk, ami sei koalia barak ba malu. Matebia nia konselu mak ida nee, ita nia maluk barak mate ona ita tenki halo luta ho ulun-fatuk labele halo ho fuan ho nervus deit. Ho ulun-fatuk hodi fungsiona didiak hodi poupa ema restu neebe sei moris,” David haktuir matebia nia lia-fuan ba Jornalista sira iha Comite Central Fretili (CCF) Comoro, Sabadu (16/9/2017).

Deputadu nee realsa liutan katak, nia kuinese diak liu matebian Ali nia privadu hanesan ema neebe simples, lakoalia barak koalia uainhira iha hanesan subtansi nia sente katak los diak, enkonsonasi ho situasaun foin nia kolia, nia kolia halimar mos mais ho temperadu.


"Hau sente kamarada Mari Alkatiri nuudar matebian nia alin iha korajem ho maun alin sira hotu iha karater no konsiensia no forsa sufisiente katak buat ida vida nee hanesan. Tan nee fila fali ba ita ema kuando moris hahalok diak uainhira mate ema sei lahaluha ita, ita mos labele obriga ema gosta ita, pur mais hanesan Jesus Cristu neebe halo diak maibe to ikus ema saran ba mate iha kruz, bele dehan nee hanesan  dialetika da vida kontradisaun  entre a luta dos kontrarius,” katak David.

Aproveita okportunidade nee David mos akrejenta liutan katak iha momentu uluk seidauk iha servisu, matebian halo kriasaun aviaria hakiak manu hanesan agora karik ayam potong ba faan.

Tanba nee ami nain-rua iha ligasaun neebe diak sempre koalia bebeik, nunee hau hatene matebian ema diak ida, tanba nia sempre ajuda ema neebe nesesita nia ajuda, hanesan Matebian Ali nia liafuan katak “buat neebe nia iha nia sei fo”.
Matebian Ali Bin Hamud Alkatiri neebe moris iha Lurumatan Dili (19/11/1945, husik hela fen ho oan.

Matebian nuudar maun husi Primeiru Ministru (PM) Mari Alkatiri, durante nia moris kontribui buat barak hanesan moral, espritual no material nunee mos nia kumpri ona nia obrigasaun hanesan Timor-oan.

Nunee mos, Djafar Bin Amude Alkatiri nuudar alin husi matebian dehan, Maromak hadomi liu matebian tan nee maske triste ami husik nia ba ho Maromak, neebe ami konfirmadu tanba destinu Maromak mak determina.

"Figura Matebian Ali hanesan maun-boot ida neebe diak ami hotu nunka hatene problema, tanba nia iha fuan nee nurak no boot hakoak ema hotu. Nee duni, ba nia aan nia ladun interese maibe nia haree liu ba ema seluk,” Djafar haktuir nia maun nian hahalo husi durante nia moris.

Entertantu Vise Prezidente Partidu Fretilin Francisco Miranda Branco hateten, bainhira Fretilin rona naran neebe sei ezersisa inan ida neebe suku bandeira Fretilin nian ho bandeira Nasional RDTL ida nee mak inan husi ita nia kompaneiru matebian Ali Alkatiri.

Ali Alkatiri nuudar membru CCF husi kedan tinan 1975, fila husi foho tun mai Dili iha susar nia laran hela iha Dili ida nee mak nia ema kunese Ali Alkatiri ho simplisidade Ali Alkatiri nian maka ema kuinese nia, nia mos ema ida ke terus hamutuk ho Fretilin.

Nee mak memoria Ali Alkatiri husik hela mai ita, momentu tranzisaun loron ida ohin CCF simu iha fatin ida nee, nuudar nia oan ida neebe didika nia-aan tomak ba Fretilin.

Prezidente Bankada Fretilin iha Parlamentu Nasional nee mos, realsa liutan katak, kompaneiru Ali Alkatiri halo ona viajen ida neebe ba mundu seluk sei la fila, maibe matebian nia memoria sei rejista nafatin iha familia Fretilin sira nia laran.

Ami fiar kompaneiru sei fo kbiit no forsa liu tan iha momentu ida neebe Fretilin simu knar ida defisil, maibe importante ba moris povu ida nee nian,” katak Branco.

Entretantu tuir informasaun neebe jornalista hetan katak, prosesu funeral halao tiha ona hodi seik iha Simiteriu Musulmanu Taibessi. Familia matebian sei diriji reza Tahlilan durante loron tolu (3). 

Maria Lay/Carme Ximenes | Suara Timor Lorosae

Sem comentários: