Involve Prostituta, Tanba Hahalok Mane

DILI - Diretor Ezekutivu Comisaun Nasional Combate Hiv-Sida Timor-Leste (CNCS-TL) Daniel Marcal hatete, feto balu neebe monu ba vida prostitute, tanba kauza husi mane nia hahalok.

Dehan Daniel ba jornalista  sira iha nia knar fatin, Kinta (28/9/2017).

Tuir Daniel katak, dala barak ema balu hasai liafuan aat hodi insulta  feto  balun hodi  dehan feto kupu-kupu malam ho tan lia-fuan seluk. Hus ilia-fuan sira nee hanesan halo diskriminasaun boot ida ba feto maluk.

“Bainhira hau konese didiak problema nee entau hau dehan feto sira neebe halao vida hanesan nee inklui terus no mos sai vitima hanesan, tanba sira vitima husi mane sira,”katak Daniel.

Feto sai vitima katak, Daniel, husi mane primeiru husi kaben nain sira, tanba agora dadaun feto neebe tama iha vida ida nee laos feto foin sae maibe balun iha oan ida ka rua.

Uluk kaben halo promesa iha igreja no iha amu no maromak inklui familia tomak nia oin maibe ikus mai tanba deit problema kiik oan iha uma tenke divorsiu ka soe malu.

Kauza husi atetude ida nee mak, iha feto balun hakarak ka lakohi balun tenki involve-aan ba mundu prostitute tanba ezizensia nesesidade ekonomia  uma-laran.

Ikus mai ninia konsekuensia mak hasoru risku HIV-Sida, balun hetan tan violasaun seksual hanesan ema uza tiha laselu. Tanba nee sira moris iha terus nia laran maibe sira atu kesar mos tauk tanba sira nia moris mak hanesan nee ona.

“Ema halo vida hanesan nee laos buat fasil normalmente ema hetan osan U$ 10 Dolar Amerikanu. Atu hetan osan nee mos laos buat fasil tanba sira terus, maibe tanba moris nee obriga sira nee duni tenke halo no ida nee ba feto sira neebe kaben nain,”dehan Daniel.

Nunee mos ba   feto sira neebe klosan, feto klosan barak oras nee halo sira nia vida sai hanesan nee tanba namora livre demais.

Foin namora deit buka moris hamutuk hanesan feen ho laen, maibe nia lafiar katak  atu moris  hanesan nia fen-lain  ka lae?

“HIV-Sida nee hanesan fuan ida husi ita nia hahalok, tanba nee tenki serbisu makaas hodi muda ema nia hahalok hanesan komportamentu seksual, moral ba fen ho laen sira inklui hasae ema nia konsiensia. Uainhira   muda buat hirak  nee fiar katak virus HIV tun ona. Virus refere iha mundu daet barak liu husi relasaun seksual inklui Timor-Leste kuaze 95% nee mai husi relasaun seksual.

Iha fatin ketak Mariana da Costa  nuudar Inan ida  husi Suku Comoro dehan, feto klosa no mane klosan neebe namora livre demais, ikus mai moris hamutuk hanesan feen ho laen, feto isin rua  mane lakoi haree, responsabilidade, mane soe tiha. Tanba nee nuudar feto ida nia vida moris feto hotu ona entau nia hanoin barak inklui hanoin oin ladiak ona, inan-aman mos balun hirus no nega, subar, tauk, entau sira halai ona ba vida risku nee.

“Hau hasoru maluk feto barak neebe koalia ho matan been no terus tanba problema refere tanba nee oinsa mak ita atu hatene sira nia problema, presiza  azuda halo intervensuan ruma,” katak Mariana.

Tuir Mariana katak, nuudar ema umana iha dignidade mos hanesan. Tanba nee mak hau fiar katak laiha feto ida atu monu arbiru ba hahalok sira hanesan nee, maibe tanba kondisaun nesesidade ekonomia mak obriga. 

Jeniche da Costa | Suara Timor Lorosae