Dezembru 2017, Polisia Nain 180 Sei Halao Estajiu

DILI - Membru Polisia Nasional Timor Leste (PNTL) nain 180 neebe oras nee dadaun tuir ona formasaun, tuir planu, iha fulan Dezembru 2017, sei halao estajiu. Sira nia estajiu remata, sei halo graduasaun iha dia 16 Janeiru 2018.

Liafuan hirak nee hatoo husi Kombandante Sentru Formasaun Akademia PNTL, Arquemino Ramos ba STL hafoin enkontru ho Ministru Defeza no Seguransa Jose Agostinho Sequeira Somotxo iha Kuartel Jeral F-FDTL Fatuhada, Dili, Kinta (28/9/2017).

Formasaun ba membrus polisia nain 180 nee, oras nee dadaun lao nafatin iha Sentru Formasaun Komoro.

Preparasaun ba formasaun polisia neebe rejista, hamutuk nain 183. Husi numiru nee, nain tolu elemina tiha (nain rua moras tanba hetan dezastre no ida seluk hetan moras mental). Tanba nee hela deit nain 180 maka sei kontinua nafatin formasaun.

Sira nain 180 neebe tuir formasaun ba dala lima nee, mesak mane deit. Antes nee, formasaun dala tolu no ba dala haat, feto iha. Formasaun ba dala lima nee feto laiha. Materia sira maka fo ba formasaun sira, maka hanesan tekniku professional polisia, fo kunhesementu modulu ba leis. Material sira seluk maka treinu fiziku, treinu tiru, halo investigasaun kriminal, no polisiamentu kriminal.

 “Formasaun ba membrus polisia hamutuk nain 180 nee lao hela nafatin. Maibe nomiru neebe maka rezista hamutuk 183. Husi nomiru ida nee nain tolu elimina tiha ho rajaun katak nain rua moras tanba hetan dejastre, no ida seluk hetan moras mental. Iha Dezembru 2017 sei halo estaziu no iha 16 de Janeiru 2018 sei halo graduasaun,”nia dehan. 

Justinho Manuel | Suara Timor Lorosae