KI Identifika Mídia TL Viola Prinsípiu Jornalizmu

DILI, (TATOLI) – Rezultadu análize no monitorizasaun Konsellu Imprensa (KI) fó sai katak mídia sira iha Timor-Leste (TL) kuaze komete infrasaun hodi viola prinsípiu universál jornalizmu nian hanesan fonte únika ba notísia ida nomos la kobre fonte rua hotu (cover both sites).

“Presiza iha espasu iguál ba parte hotu-hotu ne’ebé sai objetu ba produtu jornalístiku kanál sira nian atu kumpri prinsípiu universál jornalístiku cover both side”, rekomenda Diretór Departamentu Dezenvolvimentu no Análize Mídia (DDAM) KI, Alberico da Costa Junior ba mídia sira iha Fundasaun Oriente, ohin.

KI mós rekomenda ba órgaun komunikasaun sosiál sira katak presiza iha konsellu redasaun ida ne’ebé forte no indepéndente husi influénsia hotu-hotu iha kada kanál mídia atu garante lia-loos no públiku ninia direitu ba informasaun.

Presiza iha formasaun kontinua kona-ba étika jornalístika no lei komunikasaun sosiál ba jornalista timoroan sira nune’e bele evita konsekuénsia no risku legál sira iha futuru.

Nune’e mós, kanál mídia ka jornalista sira presiza estabelese “Editór Club” ida atu asegura no garante kualidade produtu jornalístiku ne’ebé kanál mídia sira tranzmite ka públika.

Xefe redasaun Jornál INDEPEDENTE, Gaudencio Marques Figueredo iha nia intervensaun hateten katak nia parte apresia ho rezultadu ne’ebé KI fó sai.

Kona-ba “cover both side”, iha enkontru redasionál jornál nian sempre fó orientasaun ba jornalista maibé dalaruma mai la tuir saida mak redasaun hakarak maibé sempre kontinua esforsu hadi’a aan di’ak liutan.

Nia mós sujere ba KI atu loke ká formasaun ruma tan ba jornalista timoroan sira atu bele hasa’e liutan sira-nia koñesimentu hodi hala’o kna’ar ho profesionál liutan.

Entretantu rezultadu análize no monitorizasaun ne’ebé KI fó sai katak infrasaun sira ne’e mak mídia imprensa hanesan jornál Suara Timor Lorosa’e (STL) edisaun marsu, (14/2017), pájina 1, edisaun jullu, tersa (30/5/2017), pájina 1, edisaun juñu, tersa (6/6/2017), pájina 14, edisaun juñu, (22/6/2017), pájina 12 no edisaun jullu, sesta (17/7/2017), pájina 23.

Jornál TIMOROMAN edisaun juñu, (21/6/2017), pájina 1, edisaun jullu, (01/7/2017), pájina 1-15.

Rádiu Timor-Leste (RTL), edisaun marsu, (6/3/2017). Teleizaun Timor-Leste (TVTL), edisaun juñu (24/6/2017).

Jornál TIMOR POST edisaun marsu, (6/3/2016), pájina 1, edisaun juñu (27/6/2017), pájina 1-23, edisaun jullu, (5/7/2017), pájina 1-23.

Jornál INDEPEDENTE, edisaun marsu, kuarta, (8/3/2017), pájina 1, edisaun juñu, kuarta (28/6/2017), pájina 1-15.

Jornál Diáriu Nasionál (JDN), edisaun marsu, kinta (16/3/2017), edisaun jullu, tersa (18/7/2017) no edisaun jullu, segunda (24/7/2017).

Jornál MATADALAN, edisaun fevereiru, (1-7/2/2017), pájina 16, edisaun maiu, (3-9/5/2017), pájina 16.

Jornál TEMPO SEMANÁL, edisaun jullu, (17/6/2017), pájina 4.

Tuir mai mídia online tafara.org, edisaun marsu, (13/3/2017), edisaun jullu, kinta (13/7/2017), pájina kampaña polítika.

Ajénsia notisioza, ANTIL (seidauk tau naran), edisaun marsu, (6/3/2017), hafoin hanaran ba TATOLI, edisaun jullu, (18/7/2017).

Rezultadu análize ne’e KI halo ba publikasaun mídia Timor-Leste sira durante kampaña no périodu eleisaun prezidensiál no parlamentár 2017.

Jornalista: Rafy Belo | Editora: Rita Almeida

Foto: Diretór Departamentu Dezenvolvimentu no Análize Media (DDAM), Alberico da Costa Junior. Foto: KI