‘Mandate’ Husu PN Ezije Asuwa’in Sira Nia Rate Ba Indonézia

DILI, (TATOLI) - Deputadu Parlamentu Nasionál David Dias Ximenes “Mandate” husu ba Prezidente Parlamentu Nasionál, Aniceto Guterres, atu husu ba autoridade militár Indonézia hodi hatudu rate Timoroan sira nia ne’ebé mate iha tempu okupasaun Indonézia nian hodi nune’e iha klareza ba família sira.

“Ami hakne’ak, ami harohan, ami husu, ba Prezidente Parlamentu Nasionál hodi husu ba autoridade militár Indonézia sira, ita nia mate sira ne’ebé sira lori lakon iha ne’ebé ona, enkuantu ita fó fatin ba sira atu hadi’a sira nia semitériu iha Dili no Baukau,”  David Dias Ximenes levanta kestaun ne’e iha uma fukun, ohin, Segunda (25/09).

Nia dehan, Timor oan sira hanesan saudozu Nikolau Lobato, Antonio Carverinho, Aisha Basarewa no sel-seluk tan. Estadu Indonézia tenke hatudu nia rate tan oras ne’e Timor oan sira lahatene nia asuwa’in sira nia hakoi fatin.

“Tenke husu tanba autór hanesan jenerál barak mak sei moris hela iha Indonézia,” Mandate ezije.

Hodi hatutan, governu Indonézia nian tenke hatudu rate asuwa’in Timor oan sira ne’ebé mate hosi tinan 1975, 1980, 1983, 1992 no seluk tan, tanba Timor rasik oferese ona oportunidade hodi estadu Indonézia hadi’a sira nia semitériu iha Dili no Baukau.

Antes ne’e, ulun boot Militár Indonézia ka Panglima TNI Jenerál Gatot Nurmantyo, to’o iha Dili iha Kuarta (20/9) hodi vizita iha Timor Leste.

Iha vizita ne’e, ba loron ida Panglima TNI Jeneral Gatot Nurmantyo nian nee, atu hare ho matan Semitériu eroi (Taman Makam Pahlawan) iha Dili no Baukau, nu’udar pasu ida ba realizasaun akordu entre governu Indonézia ho Timor-Leste katak, semitériu eroi Indonézia nian nafatin iha TL, maibé iha fatin rua de’it hanesan Taman Makam Pahlawan Seroja Dili no Taman Makam Pahlawan Baukau.

Entretantu Semitériu eroi sira nian iha Munisípiu seluk muda hotu ba Dili no Baukau. Exceptu Munisípiu Kovalima no Bobonaru muda ba Atambua.

Objetivu konsentra mate sira ne’e iha semitériu  Dili no Baukau atu fasilita família sira bainhira halo vizita hodi sunu lilin ba eroi sira ne’e.

To’o notísia ne’e hatún seidauk iha reasaun ruma hosi Prezidente Parlamentu Nasionál relasiona ho preokupasaun deputadu David Dias Ximenes nian.

Ekipa Kobertura  

Foto: Prezidente Asosiasaun Kombatentes Veteranus ba Luta Libertasaun Nasionál Timor-Leste, David Dias Ximenes. Foto Tatoli/Xisto Freitas