PLP “Prostesta” Tama Lista Governu, Fidelis: Lareprezenta Partidu

DILI — Bankada Partidu Libertasaun Popular (PLP), konsidera politika Partidu ezekutivu bolu kuadru PLP tama iha VII governu lalos, tanba la hetan autorizasaun husi partidu.

Tuir XefeBankada PLP iha Parlamentu Nasional, Fidelis Magalhaes orientasaun husi partidu PLP nian, klaru laiha autorizasaun ema ida ba em nome partidu hodi junta  iha orgaun ezekutivu. Partidu PLP nia orientasaun klaru, tanba nee PLP sei laorienta nia ema atu ba inklui iha governu, tanba desizaun mak opozisaun.

“Se partidu ida iha ezekutivu konvida membru husi partidu seluk, ba individu nee lalos, se atu konvida tenke komunika ho lider partidu. Tanba atu atinji objetivu nasional, atu asegura povu nia interese, ita mos tenke define lo-los politika partidu nian, tanba partidu nee hanesan makina lori ita atinji interese nasional,” dehan Fidelis ba Jornalista Segunda (25/09/2017) iha PN.

Nia hatutan PLP sai hanesan opozisaun atu ba halao fiskalizasaun ba programa governu nian, laos atu ba hamutuk fali ho governu. Implementa partidu ezekutivu nia programa, nee lalos. PLP laautorizania ema atu hola parte iha ezekutivu. Maske iha figura PLP balu tama iha lista VII governu nee  la em nome partidu,  nian, tanba politiku partidu nian  so prezidente partidu mak define, iha nia bankada ezekuta politiku partidu nian, ba interese nasional no interese estadu.

Nunee mos Deputada Maria Angelina Lopes Sarmento husi bankada PLP dehan,naran neebe hetan konvita ba membru VII Governu Konstitusional ba hanesan individual, tanba desizaun internal partidu nia klaru ona, katak PLP mantein ninia pozisaun hanesan oposizaun, nunee  individu sira neebe ba la liu husi desizaun partidu nian,  ba hanesan  individual.“  Sira neebe maka tama ba governu nee ba sira nia desizaun ba individu nia hakarak, laos desizaun tanba iha akordu ida eskritu entre partidu ho sira para ba, nee individualmente nia desizaun ,” dehan Deputada Maria.

Nia hatutan Prezidente PLP Taur Matan Ruak ninia desizaun klaru PLP laharuka nia membru atu tama iha governu, Prezidente nia desizaun orientasaun desizaun hamutuk ho orgaun partidu sira katak, PLP neebe hetan votus kadeira ualu, tur iha Parlamentu Nasional hanesan oposizaun.“ To agora hau seidauk hatene membru sira neebe maka atu foti desizaun hodi tama ba iha VII Governu Konstitusinal,” dehan Maria Angelina.

Iha parte ketak Emprezariu Rui Castro liu husi telefone hateten, nia parte seidauk simu informasaun husi se deit, atu tama ba iha VII governu Konstitusional, tanba agora dadaun halo hela tos no hakiak animal. “Hau la envolve iha partidu nia laran,” dehan Rui Castro.

Entretantu tuir informasaun neebe maka espalla iha publika katak, membru PLP nia ema balu envolve iha VII Governu Konstitusional neebe maka lidera husi Primmeiru Ministru Mari Alkatiri maka hanesan, Jose Neves sei assume kargu hanesan Ministru Edukasaun, L-4 hanesan Ministru Dezenvolvimentu Rural, Rui Castro hanesan Vise Ministru Estatal no Azevedo Marsal hanesan Ministru Ministru Turismu e Kultura.

Entretantu Francisco Branco Xefi bankada Fretlin rejeita fo komentariu konaba  lista membru governu neebe sei simu pose iha Kuarta mai inklui kuadru  PLP.

Projetu Abandona

Liu husi sesaun plenaria Bankada PLP iha uma fukun Parlamentu Nasional, hatoo noa preokupasaun konaba projetu emerjensia neebe maka abandona hela governasaun neebe lidera husi CNRT.

Deputadu Mericio Akara husu Ministeiru relevante atu halibur dadus, entrega ba iha Parlamentu Nasional  nunee  deputadu sira bele halo  nia knar fiskalizasaun, tanba populasaun babain kestiona projetu hirak nee, tinan ba tinan la hotu, i balun abandona.

Nia mos husu karik governu bele fo atensaun emediata, hanesan projetu rehablitasaun jardin Kristu Rei.“ bai bain ita hotu ba Kristu rei, ita akompana, ita haree projetu nee, lao kleur liu, lao neneik liu, iha tendensia abandona, tanba hau hanoin ministeriu relevante mai halo klarifikasaun no esplikasaun mai ita, tanba nee akontese, iha sidade Dili, nee ita hotu hotu tau matan,” dehan Deputadu Mericio.

Deputadu nee informa, nuudar deputadu tenke hatene projetu sira neebe abandona ninia problemasaida, tanba nee husu klarifikasaun, tanba laos deit projetu ida nee deit maka abandona, maibe projetu boot sira seluk tan.

“Ami hanoin projetu laos ida nee deit, maibe iha fatin barak dala ruma projetu boot tan,” komenta Mericio.

Iha parte ketak Direitor ONG Gertak Faustinho Magno husu ba governu atu hare projetu nee maka halo iha tempu governu AMP mai to Kintu Governu Konstitusional,  tanba obra sira nee emprezariu sira halo laiha kualidade ,  balu abandona  too agora.

Entretantu Manuel da Costa hanesan emprezariu Nasional dehan,durante nee ema sempre kestiona konaba projetu neebe maka emprezariu Timor oan sira halo laiha kualidade, maibe sira lakestiona emprezariu Internasional sira neebe maka mai halo projetu hanesan halo estrada balu laiha kualidade. 

Guilhermina F/Carme X./Maria L | Suara Timor Lorosae

Foto: GMNTV