Alemaña/Eleisaun: Merkel manán, nasionalista sira iha parlamentu

Xanxeler alemã Angela Merkel manán mandatu dahaat iha loron-domingu, maibé tenki halo koligasaun, hafoin votasaun ida ne'ebé iha liu diminuisaun iha Uniaun Demokrata-Kristaun (CDU), hatete hosi rezultadu ikus iha loron-segunda ne'e. 

Iha fatin datoluk okupa hosi Alternativu ba Alemaña (AfD), nasionalista ho anti-imigrasaun, ne'ebé tama ba dala uluk iha parlamentu alemaun (Bundestag).

Tuir rezultadu ikus sira ne'ebé fó sai antes tuku 04:00 (oras lokal), CDU hosi Merkel nian no aliadu Uniaun Sosial-Kristaun (CSU) hosi Baviera manán ona 33% hosi votu sira, ki'ik duké 41,5% ne'ebé hetan iha tinan haat liubá. Ne'e hanesan rezultadu ne'ebé fraku liu hosi aliansa hafoin funu.

Partidu Sosial-Demokrata (SPD) hela iha fatin ikus, ho 20,5%, ki'ik liu hosi 25,7% ne'ebé maka hetan iha 2013, ne'ebé hanesan mós rezultadu aat liu hafoin funu.

AfD hetan ona 12m6% hosi votu sira, tuir Partidu Liberal (FDP), ne'ebé fila fali ba parlamentu hafoin pauza ida tinan haat nian ho 10,7%.

Liberal sira uluk hanesan ona parseiru hosi koligasaun ho Merkel iha mandatu daruak, hosi 2009 no 2013, maibé lakon fatin tomak iha tinan haat liubá.

Partidu Die Linke (eskerda) konsege 9,2%, aas oituan duké partidu Grüne, ho 8,9%, kompleta ona parlamentu ida ho forsa neen, la hanesan ho tinan anterior sira ho haat.

AfD, ho de'it tinan haat, sentra ona durante kampaña krítika sira hasoru Merkel no hasoru desizaun ne'ebé halo iha tinan 2015 hodi autoriza entrada hosi númeru aas ba migrante sira iha Alemaña. Líder ida hosi partidu Alice Weidel hatete ona katak sei halo parte iha "opozisaun konstrutivu" ida maibé ko-líder Alexander Gauland hatete sériu liu, promete "rekupera nasaun" no "buka tuir" Merkel.

Antigu prezidente Parlamentu Europeu no líder hosi SPD Martin Schulz admiti ona katak partidu hetan "lakon eleitoral maka'as" ida no afirma ona katak sei husik koligasaun ho Merkel no pozisiona iha opozisaun.

Maski iha rezultadu ne'ebé ladún metin, ne'ebé tenki iha fali koligasaun foun sira, Merkel garanti ona estabilidade.

"Ami iha mandatu ida hodi harii Governu foun ida, no laiha Governu ida maka bele harii kontra ami", xanxeler hatete no hatutan katak iha tinan haat ikus ne'e "iha dezafiu maka'as tebes".

Xefe governu alemaun subliña ona katak "hasoru daudaun tempu ne'ebé susar tebes" iha nível internasional, no nia afirma: "Ha'u iha intensaun hodi konsege [estabelese] governu estável ida iha Alemaña".

Partidu tradisional tomak la admiti posibilidade hodi serbisu ho AfD no konservador sira Merkel nian sei la harii koligasaun ho Die Linke.

Ho sosial-demokrata sira promete tama ba opozisaun, iha de'it posibilidade hosi governu: kombinasaun ida ho konservador sira, liberal sira no ho Grüne.

Aliansa ne'e sei koñesidu hanesan "Jamaika" tanba kór sira hosi partidu sira hanesan ho bandeira hosi nasaun Karaíba nian.

AfD hanesan partidu direita hosi konservador dahuluk maka tama iha parlamentu iha tinan 60 nia laran.

Merkel kompromete atu halo "análize klean" ida hosi rezultadu sira. "Ami hakarak konkista fali eleitor sira hosi AfD, rezolve problema sira, konsidera mós sira nia preokupasaun no tauk sira no, liuliu, ho polítika di'ak sira.

SAPO TL ho Lusa