CNRT Deskonese, Agio Tama Governu, Estabilidade Governativa

DILI — Partidu Congresu Nacional Rekonstrusaun Timor Leste (CNRT), liu husi Conselho Politika Nacional (CPN) deskonese nia kuadru neebe tama iha setimu governu konstituisional.

Partidu CNRT mos deskonese  Eis Ministru Estadu Prezidensia Konsellu Ministru, Hermenegildo Augusto Cabral Pereira, sei kaer pasta hanesan Adjuntu Primeiru Ministru, no Prezidensia Konsellu Ministru iha setimu governu, tanba seidauk simu karta ofisial husi mais votadu Fretilin.

Tuir Segundu Vise Prezidente Partidu CNRT, Virgilio Smith, partidu simu orentasaun atu deklara ba publiku konaba kuadrus partidu nian neebe envolve   iha governu.

“Ami atu hato ba kuadrus, militantes CNRT nian iha baze katak bazea ba kompromisiu partidu nian neebe hatoo ona iha eleitoral dehan ona katak partidu CNRT lama maioria apsoluta iha eleisaun jeral, partidu sai deit opozisaun iha parlamentu nasional. Nunee moos bazea ba rezultadu konferensia partidu nian liu husi rezulusaun katak partidu CNRT se sai deit opozisaun,” dehan Virgilio liu husi Konfrensia Imprensa neebe halao iha sede CNRT iha Bairo Gerilhos Dili, Sabadu, (30/9/2017).

Virgilio informa partidu  se la autoriza nia membrus ka  kuadrus sira envolve iha governu, tanba seidauk simu karta ofisial husi partidu mais votadu  konaba envolvimentu kuadru  partidu CNRT nian  iha governu.

Nia hatutan envolvimentu kuadru sira nian iha governu partdu hatene liu husi informasaun neebe fo sai iha rede sosial. Tanba nee Partidu hasai pontu tolu importante katak, bazea ba rezultadu konferensia No. 1/Res/P-CNRT/VIII/2017 hodi foti desizaun atu sai opozisaun iha PN.  Nunee partidu la autoriza nia kuadrus ka membrus partesipa ka integra iha governu. Kuadrus ka militantes neebe partesipa iha governu nee nuudar individual  tenke rejigna an husi partidu.

Estabilidade Governativa

Entretantu Xefi Bankada Fretilin iha uma fukun Parlamentu Nasional,  Fransico Miranda Branco dehan ema hotu bele fo opiniaun  katak governu nee sei monu iha dalan, nee liberdade de espresaun, ema hotu iha direitu bele koalia. Maibe VII governu neebe forma husi Partidu Fretilin no PD, fiar katak estabilidade governativa sei ladepende deit ba ukun nain sira, maibe ema hotu iha nasaun ida nee.

“Ami hanoin katak estabilidade governativa laos depende deit ba ema neebe kaer ukun, maibe ba ema hotu-hotu hanesan sosiedade, povu hotu tenke garante katak  governu tenke lao too 2022,” katak Branco.

Branco relata, governu ida nee forma husi koligasaun  Fretilin ho PD  atu  lao too 2022, ida nee hanesan vitoria ida ba povu  hotu liu-liu ba istoria atu rezista katak povu iha rai kiik ida nee halao nia governasaun too fim mandatu. Tan nee Fretilin nafatin fiar aan, agora dadaun ho PD  deit mos bele lao dadaun.

Iha fatin hanesan Deputadu Manuel Tomas Lito Rambohusi bankada PD dehan Partidu politiku sira neebe mak hamriik nee nia objetidu atu dezenvolve,  servi  povu no nasaun. Karik iha ema balu hakarak atu halo governu nee monu mos bele. Maibe keta haluha katak governu minoritariu nee maun Xanana aplika tiha ona tinan kotuk liu ba, remodela tiha Frenti mudansa no PD, obriga lider Partidu Demokrtaiku sira halo karta ba Primeiru Ministru no ba partidu CNRT deklara  independentemente, katak lamai husi partidu ida.

Iha momentu neeba governu PN iha 30 kadeir, nee insidensia parlamentar lao, tanba nee bolu fali pesoa balu husi partidu seluk hanesan Rui Maria de Araujo ba asume knar PM no sira seluk tan. Ho nunee Fretilin asegura estabilidade governativa durante tinan 2 resin.Haree ba politika ida nee Fretilin halao tiha ona, ida nee fiar katak CNRT mos sei halao ida nee ba oin.

Entretantu iha parte seluk Reitor UNDIL, Estavao Belo hatete, governu neebe forma husi Fretilin ho PD sei garante estabilidade, tanba partidu hotu neebe hetan asentu parlamentar sei koopera hamutuk atu nunee bele fo benfisiu ba moris povu nian. 

Justinho Manuel/Guilhermina Franco | Suara Timor Lorosae